असार । अछाम जिल्लाको पंचदेवल विनायक नगरपालिकामा १६ वर्षीय किशोर मृत भेटिएसँगै नगरपालिकामा लगाईएको ताला १० दिनदेखि खुल्न सकेको छैन ।

मृत भेटिएका नगरपालिकाको वडा नम्बर ४ कालिकास्थानका विनोद शाहीको हत्या भएको भन्दै स्थानीय तथा आफन्तहरूले जेठ २२ गतेदेखि नगरपालिका कार्यालयमा तालाबन्दी गरेका थिए ।

सोही नगरपालिकाको वडा नम्बर ४ कालिका स्थानको वडा कार्यालयमा समेत तालाबन्दी गरिएको छ । हत्यारालाई पक्राउ गरी कानुनी दायरामा ल्याउनु पर्ने माग सहित जेठ २२ गते नगरपालिकामा लगाईएको तालाबन्दी हालसम्म खुल्न नसकेको हो ।

१० दिन बितिसक्दा समेत तालाबन्दी नखुलेपछि स्थानीय नागरिक नगरपालिकाबाट दिइने सेवाबाट बञ्चित छन् ।

नगरपालिकाको कार्यपालिका बैठक, विभिन्न सिफारिस, योजना सम्झौता, अनुगमन र रकम भुक्तानी र आगामी आर्थिक वर्षका लागि तय गरिने नीति तथा बजेटको काम प्रभावित भएको छ भने नगरपालिका भित्रका नौ वटैको वडाको कामकाज समेत प्रभावित बनेको छ।

स्थानीय तथा मृतकका आफन्तको तालाबन्दीका कारण नगरपालिकामा नवनिर्वाचित भएर शपथ ग्रहणपछिको पहिलो बैठक समेत हुन नपाएको नगरका उपप्रमुख हर्क बहादुर रावलले बताएका छन्।

सहमतिका आधारमा नगरपालिका र वडामा लगाईएको ताला खोल्नका लागि पहल भइरहेको उनले जानकारी दिए।

अछामका प्रमुख जिल्ला अधिकारी विश्वराज मरासेनीले भने स्थानीय तहबाटै तालाबन्दी खोल्नका लागि पहल गर्नुपर्नेमा जोड दिएका छन् ।

स्थानीय तहमा सहमति नजुटेमा अन्तिममा प्रशासनको भूमिका रहने उनको भनाई रहेको छ। स्थानीय तहमा समस्या समाधान नभए आफू सर्वदलीय बैठकबाट तालाबन्दी खोल्ने वातावरण तय गर्ने उनले बताएका छन्। नगर प्रमुख अम्बिका चलाउनेको योजनामा विनोदको हत्या भएको भन्दै पीडित पक्षले चलाउने सहित १३ जना विरुद्धमा जिल्ला प्रहरी कार्यालय अछाममा जेठ २५ गते किटानी जाहेरी दर्ता गरेका छन्।

किटानी जाहेरीसंगै केही व्यक्तिलाई नियन्त्रणमा लिएर घटनाको अनुसन्धान भइरहेको अछाम प्रहरीले जानकारी दिएको छ।

किटानी जाहेरीमा नाम उल्लेख भएका सबैलाई पक्राउ नगरुन्जेल तालाबन्दी नखोल्ने मृतकका आफन्तको अडान छ ।

जेठ १७ गते राती स्थानीयबीच झडप भएपछि घटनास्थलमा प्रहरी पुगेसंंगै बेपत्ता भएका पञ्चदेवल विनायक नगरपालिका ४ का विनोद शाही जेठ २१ पञ्चदेवल क्याम्पस नजिकको कुच्ची भिरमा मृत अवस्थामा भेटिएका थिए।