काठमाडौं, १३ असार । प्रेस काउन्सिल नेपालका पदाधिकारीलाई धम्की दिने दुईजनालाई प्रहरीले पक्राउ गरेको छ ।

सामाजिक सञ्जालमार्फत धम्की दिने इलाम घर भई ललितपुरको बागडोल बस्ने ५० वषीय विनोद गौतम र नवलपरासी सुनवल नगरपालिकाका ३६ वर्षीय विष्णु ढकाललाई पक्राउ गरेको हो ।

महानगरीय प्रहरी अपराध महाशाखाबाट खटिएको प्रहरी टोलीले दुवै जनालाई पक्राउ गरी आवश्यक अनुसन्धान भइरहेको जनाएको छ ।

टेलिभिजन कार्यक्रम ‘सीधा कुरा जनतासँग’को विषयमा परेको उजुरीको छानबिनको घटनालाई आधार बनाई नेपाल प्रेस काउन्सिलका पदाधिकारीलाई सामाजिक सञ्जालमा आपत्तिजनक, अमर्यादित शब्दहरु प्रयोग गरी पोस्ट र कमेन्ट गरेको पाइएकोले प्रहरीले पक्राउ गरेको जनाएको छ ।

काउन्सिलका पदाधिकारीहरुको व्यक्तिगत जीवन तथा मान प्रतिष्ठासमेतमा आघात पुर्‍याउने र ज्यान मार्ने धम्की दिएर सामाजिक सञ्जालमा स्टाटसहरु लेखेको पाइएपछि उनीहरु पक्राउ परेका हुन् ।

पक्राउ अभियुक्तहरुलाई विद्युतीय कारोबार ऐन अन्तर्गत अनुसन्धान कारवाहीको लागि आज महानगरीय प्रहरी परिसर, काठमाडौमा पठाइएको अपराध महाशाखाले जनाएको छ ।

विद्युतीय कारोबार ऐन २०६३ को दफा ४७ बमोजिम यस्तो कार्यमा संलग्नलाई दुई लाख रुपैयाँसम्म जरिवाना वा पाँच वर्षसम्म कैद सजायँ वा दुबै सजाय हुने व्यवस्था छ ।