काठमाडौँ, २५ माघ । रिक्त एक राष्ट्रियसभा सदस्य पदका लागि आज उपनिर्वाचन हुँदै छ । लुम्बिनी प्रदेशतर्फ एक राष्ट्रियसभा सदस्य पद रिक्त भएपछि उपनिर्वाचन गर्न लागिएको हो ।

तत्कालीन राष्ट्रियसभा सदस्य नेकपा (एमाले)का खिमलाल भट्टराईले असोज २३ मा राजीनामा दिएसँगै उक्त पद रिक्त थियो ।

आज बिहान १० बजेदेखि अपरान्ह ३ बजेसम्म मतदानका लागि समय दिइएको प्रदेश निर्वाचन कार्यालय दाङका प्रमुख नारायणप्रसाद भण्डारीले बताए । घोराहीस्थित कर्मचारी मिलन केन्द्रमा मतदान केन्द्र तोकिएको छ । मतदान सकिएपनि गणना गरिने र परिणाम आजै सार्वजनिक गर्ने तयारी छ ।

माघ ११ गते राष्ट्रियसभा सदस्य पदका लागि तीन दलबाट तीन जनाको उम्मेदवारी दर्ता भएको थियो । सत्तारूढ दलमध्येका नेकपा (एमाले), नागरिक उन्मुक्ति पार्टी र प्रमुख प्रतिपक्षी नेपाली कांग्रेसबाट गरी तीन जना चुनावी प्रतिस्पर्धामा छन् । एमालेका उम्मेदवार कुमार दसौदी र कांग्रेसका माधवप्रसाद आचार्य दुवै रोल्पाका हुन् । नागरिक उन्मुक्ति पार्टीबाट राजेन्द्रवीर राय प्रतिस्पर्धामा छन् ।

प्रदेशसभा सदस्य एक जनाको मतभार ४८ र स्थानीय तह प्रमुख उपप्रमुखमध्ये हरेकको मतभार १८ हुने गर्छ । लुम्बिनी प्रदेशमा कुल मतदाता संख्या ३०५ जना रहेका छन् । जसमध्ये प्रदेश सांसदको संख्या ८७ र पालिका प्रमुख तथा उपप्रमुख मतदाताको संख्या २१८ जना रहेको प्रदेश निर्वाचन कार्यालयका प्रमुख भण्डारीले जानकारी दिए ।

लुम्बिनी प्रदेशमा १०८ पालिका रहेका छन् । तीमध्ये कांग्रेसले ४८ पालिकामा जितेको छ । एमालेले २७, माओवादीले २५, जनता समाजवादी पार्टी (जसपा)ले ३, राष्ट्रिय जनमोर्चा र लोकतान्त्रिक समाजवादी पार्टी (लोसपा)ले २–२ तथा राष्ट्रिय प्रजातन्त्र पार्टी र जनता प्रगतिशीलले एक–एक स्थानमा जितेका छन् ।

८७ सदस्यीय प्रदेशसभामा एमालेले २९, कांग्रेसले २७, नेकपा (माओवादी केन्द्र)ले १०, राप्रपा र नागरिक उन्मुक्तिले ४–४, जसपा, लोसपा र जनमतले ३–३, जनमोर्चा र नेकपा (एकीकृत समाजवादी)ले १–१ सिट जितेका छन् ।

स्वतन्त्रबाट भने २ जनाले जितेका छन् । स्वतन्त्रबाट ३ जनाले जिते पनि निर्वाचित भइसकेपछि एक जना स्वतन्त्र निर्वाचित व्यक्ति माओवादी केन्द्रमै फर्किएका छन् ।