काठमाडौं १८ चैत । बारा–पर्सामा गएराति आएको भिषण हावाहुरीमा घाइते भएकाहरुको विभिन्न जिल्लाका अस्पतालमा उपचार भइरहेको छ ।

प्रहरीका अनुसार घाइते भएका मध्ये १ सय १६ जनाको नारायणी उपक्षेत्रीय अस्पताल वीरगञ्जमा उपचार भइरहेको छ ,भने ,नेश्नल मेडिकल कलेज, वीरगन्जमा १ सय जनाको उपचार भइरहेको छ । त्यस्तै वीरगन्ज हेल्थ केयरमा ३८ जनाको उपचार भइरहेको छ भने, गण्डक अस्प्ताल, वीरगन्जमा २८ जना गरी जम्मा२ सय ८२ जनाको जिल्लामा उपचार भइरहेको छ ।

बारामा हावाहुरी तथा असिना पानीको कारणले घर र इट्टाको चिम्नी भत्किँदा ठूलो मानवीय क्षति भएको हो । हाल घटनामा ज्यान गुमाएकाको खोजी, घाइतेको उद्दार, उपचार र रहातका लागि नेपाली सेना, नेपाल प्रहरी र सशस्त्र प्रहरी बलको टोली खटिएको छ । गम्भीर घाइते ६ जनालाई भने सोमबार बिहान नेपाली सेनाको स्काई ट्रक विमानमार्फत काठमाडौं ल्याइएको छ ।

घटनामा मृतक मध्ये २३ जनाको सनाखत भएको छ, भने ३ जनाको सनाखत हुन सकेको छैन । नारायणी शिक्षण अस्पताल, वीरगञ्जमा पठाइएको मध्ये एक जनाको उपचारकै क्रममा मृत्यु भएको छ । मृत्यु हुनेमा वीरगञ्ज–१८ का १८ वर्षीय सरोज राम छन् ।