काठमाडौं २७, चैत्र ।  पूर्व अर्थमन्त्री एवं नेपाली कांग्रेसका नेता डा. रामशरण महतले अहिलेको सरकारले भने जस्तो अर्थतन्त्र निराशाजनक नरहेको बरु सबल हुँदै गएको बताउनुभएको छ ।

एबीसी टेलिभिजनको कार्यक्रम एबीसी वाचमा कुरा गर्दै पूर्व अर्थमन्त्री डा. महतले अहिले अर्थतन्त्र धेरै सुध्रिएको दाबी गर्नुभयो । उहाँले भन्नुभयो, “ अर्थमन्त्रीले अर्थतन्त्रका केबल दुर्बल पक्षलाई मात्र उजागर गर्न खोजेको देखियो । श्वेतपत्रमा भनिएको जस्तो अर्थतन्त्र डामाडोल छैन । धेरै सबल छ । सरकारको ढुकुटी पनि रित्तिएको छैन । ढुकुटीमा अझै २ खर्ब ७१ अर्ब रुपैयाँ जम्मा छ ।”
अर्थमन्त्रीले भनेको कुरा पुरै गलत रहेको उहाँको टिप्पणी छ । उहाँले अझ थप्नुभयो, “अर्थतन्त्रमा एक दुई वटा कुरा मात्र दुर्बल छन् जस्तो व्यापार घाटा बढी छ ।

तर सबै कुरा अर्थमन्त्रीले भने जस्तो नराम्रो छैन । हाम्रो अर्थतन्त्रको कमजोर पक्ष भनेको व्यापार घाटा मात्रै हो । यसको जिम्मेवारी सबैले लिनुपर्छ । अहिलेको अर्थतन्त्रलाई अर्थमन्त्रीले गलत ढंगले प्रस्तुत गरेका छन् ।”
उहाँले विदेशी सहायता रकमको आधारमा बढेको भएपनि तुलनात्मक हिसाबले हाम्रो स्रोत साधन बढेको हुँदा विदेशी निर्भरता घट्दै गईरहेको बताउनुभयो ।

प्रधानमन्त्री केपी शर्मा ओलीको भारत भ्रमणको सन्दर्भमा उहाँले नेपाल र भारत बीच रेलमार्ग बनाउने भन्ने कुराको कुनै अध्ययन नभएकाले भारतसँग सम्झौता नभएको ठोकुवा गर्नुभयो ।
उहाँले भन्नुभयो, “ रेलमार्ग बनाउने कुरा एक किसिमको ईच्छा प्रकट मात्रै हो । नेपालले एक्सप्रेसन अफ ईन्र्टेष्ट आशय मात्र व्यक्त गरेको हो । कुनै अध्ययन नै भएको छैन । कति लगानी लाग्ने हो ? कसरी लगानी जुटाउने हो कुनै सहमति नै भाको छैन । सम्भाव्यता अध्ययन नै भएको छैन ।”

रेलमार्ग बनाउने विषय धेरै पछिको कुरा भएको भन्दै उहाँले तत्काल जनतालाई प्रत्यक्ष लाभ हुने खालका कार्यक्रमहरु ल्याउन सरकारको ध्यानाकर्षण गराउनुभयो । उहाँले भन्नुभयो, “एयरपोर्ट सुधारे हुन्छ, काठमाडौंको प्रदूषण हटाए हुन्थ्यो । बाटो घाटो पक्की बनाउन ध्यान दिए हुन्थ्यो । सरकारले सोच राख्नु भन्दा पनि काम गरेर देखाउनु प¥यो । एक वर्ष, दुई वर्ष पाँच वर्षमा के के गर्ने त्यता तिर ध्यान दिनु प¥यो ।”

भारतसँग हवाई मार्ग बारे तुरुन्त सम्झौता गर्न र व्यापार घाटा घटाउने काममा लाग्न उहाँले सरकारलाई सुझाव दिनुभयो । आर्थिक समृद्धिको लागि भाषण नभई काम गरेर देखाउन उहाँको आग्रह छ ।
फरक प्रसंगमा उहाँले निजीकरणले देशलाई फाइदा पुगेको दाबी गर्नुभयो । निजी क्षेत्रले गर्न सक्ने काम सरकारले किन गर्नुप¥यो ? भन्दै प्रतिप्रश्न गर्दै उहाँले भन्नुभयो, “सरकारले उद्योग चलाउने होईन त्यो काम त निजी क्षेत्रलाई दिए हुन्छ कमसेकम सरकारलाई कर त आउँछ । लगानी बढाउने र उद्योग व्यवसाय गर्ने वातावरण सरकारले तयार गरे पुग्छ ।”
कांग्रेस नेता एवं पूर्व अर्थमन्त्री डा. रामशरण महतसँग गरिएको कुराकानीका लागि यो भिडियो हेर्नुहोस्