काठमाडौँ, ४ वैशाख । नेपाली काँग्रेसको वैधानिकतासम्बन्धी विवादमा दायर रिट निवेदनमाथिको सुनुवाइ सकिएको छ। सर्वोच्च अदालतमा जारी बहस समाप्त भएसँगै आजै निर्णय आउने सम्भावना छ।

न्यायाधीश शारंगा सुवेदी र नृपध्वज निरौलाको संयुक्त इजलासमा बिहीबारदेखि सुनुवाइ प्रक्रिया सुरु भएको थियो। शुक्रबार दुवै पक्षका कानुन व्यवसायीहरूले आफ्नो पक्ष प्रस्तुत गरेका थिए भने अन्तिम जवाफ बहस विपक्षका तर्फबाट काँग्रेस उपसभापति विश्वप्रकाश शर्माले गरेका थिए।मुद्दाको पृष्ठभूमिअनुसार गत पुस महिनाको अन्त्यतिर काठमाडौँस्थित भृकुटीमण्डपमा आयोजित विशेष महाधिवेशनले १४औँ महाधिवेशनबाट चयन भएको शेरबहादुर देउवा नेतृत्वको कार्यसमिति विघटन गरी गगन थापाको नेतृत्वमा नयाँ कार्यसमिति गठन गरेको थियो।उक्त नयाँ कार्यसमितिलाई निर्वाचन आयोगले मान्यता दिएपछि त्यस निर्णयविरुद्ध देउवासहित तत्कालीन कार्यवाहक सभापति पूर्णबहादुर खड्काले सर्वोच्च अदालतमा रिट निवेदन दर्ता गराएका थिए।