काठमाडौं,२२ बैशाख । राष्ट्रिय जनता पार्टीले संविधानमा विमति नरहेको भन्ने सरकारको भनाई प्रति गम्भीर आपत्ती जनाएको छ ।

आईतबार देखि सुरु भएको सरकारको नीति तथा कार्यक्रम माथिको छलफलमा सहभागी हुदै राजपाका सांसद राजेन्द्र महतोले नीति तथा कार्यक्रममा ‘अब संविधान प्रति बिमति नरहेको’ भनी लेखिएकोमा गम्भीर आपत्ती र असहमति जनाउनुभएको हो ।

संविधानको सर्वस्वीकार्यता र स्वामित्वमा विमति नरहेको भन्ने नीति तथा कार्यक्रममा उल्लेखित ७ नम्बर बुँदाप्रति उहाँले गम्भीर आपत्ती जनाउनुभयो । उहाँले भन्नुभयो “कसरी विमति छैन हो ? यो कहिले देखि विमति भएन ? कसरी लेख्यो यो नीति कार्यक्रम ? आधा निन्द्रामा लेख्या हो कि कसो हो ? प्रधानमन्त्री जी हुनुहुन्न ।

यो संविधानमा विमति छैन रे ? भो अब ? अहिले नि हाम्रो पार्टीको माननिय लक्षमण लालकर्ण जी ले भन्नु भएको होइन । पचासौ पटक यो हाउसमा हामीले नै विमति देखाएको । उहाँ प्रचण्डजी बस्नुभएको छ सभामुख महोदय, त्यो संविधानमा नोट अफ डिसेन्ट लेखेर विमति जनाउने उहाँ सरकारी पक्ष नै हो फेरी नीति कार्यक्रममा कसरी विमति छैन भनेर लेख्दिनुभो ? ”

संविधानप्रति व्यापक असन्तुष्ठी रहेको र विमति रहेको स्पष्ट हुँदा हुदै संविधानप्रति अब विमति छैन भनि लेखिएको भन्दै उहाँले आक्रोश पोख्नुभयो । यसबाठ संविधान नै संसोधन नगर्ने मनस्थितिका सरकार छ भन्ने सन्देश दिएको भन्दै उहाँले त्यसलाई आफुहरुले स्वीकार गर्न नसक्ने बताउनुभयो । उहाँले “भाङ खाएर नीति तथा कार्यक्रम लेख्या हो र ?” भनी प्रश्न गर्नुभयो । उहाँले संविधानलाई सर्वस्वीकार्य रहेको भन्दै सरकारले संशोधनलाई अस्वीकार गर्न नसक्ने दाबी गर्नुभयो ।

उहाँले भन्नुभयो “जब जब बाईबल, कुरान, गीता,महाभारत संविधानलाई बनाईन्छ नि तब त्यो संविधान गईजान्छ । बाई बाई भईजान्छ । ” उहाँले सरकारले जनतालाई गुमराहमा राख्ने काम गरेको आरोप लगाउनुभयो ।

उहाँले भन्नुभयो “नीति तथा कार्यक्रम झुटको खेती जस्तै छ । सफेद झुट भन्छ नि सफेद झुट । जनताको अधिकार माथि दिन दहाडै डकैती । जनतालाई ढांट्ने । जनतालाई गुमराह गर्ने । ”उहाँले शाही सम्बोधनको शैलीमा सरकारको नीति तथा कार्यक्रम आएको टिप्पणी गर्नुभयो ।