काठमाडौं, १९ असोज । निर्वाचन आयोगले संस्कृति, पर्यटन तथा नागरिक उड्डयन मन्त्री जीतेन्द्रनारायण देवलाई २४ घन्टे अल्टिमेटम दिएको छ । नेपाल नागरिक उड्डयन प्राधिकरणका महानिर्देशकलाई आयोगको सहमतिविना सरुवा गरेको विषयलाई लिएर निर्वाचन आयोगले मन्त्री देवलाई २४ घण्टा भित्र आयोगमा उपस्थित भई स्पष्टीकरण पेश गर्न आदेश दिएको हो । निर्वाचन आयोगका प्रमुख निर्वाचन आयुक्त डा.अयोधीप्रसाद यादवको अध्यक्षतामा बसेको बैठकले २४ घण्टा भित्र स्पष्टीकरण पेश गर्न आदेश दिने निर्णय गरेको हो ।

आयोगको निर्णयमा भनिएको छ– ‘‘नेपाल नागरिक उड्डयन प्राधिकरणका महानिर्देशक संजीव गौतमलाई मिति असोज ९ गते आयोगको सहमति बिना नै स्वेच्छाचारी र बदनीयत ढंगले मन्त्रालयमा गठन भएको कार्यदलमा कामकाज गर्न जिम्मेवारी तोक्ने निर्णय गरी निज संजीव गौतमलाई पत्र दिइएको देखिएको, महानिर्देशकलाई हाजिर हुन पत्र पठाएपछि सोही मितिमा आयोगमा सहमतिका लागि पत्र लेखेको देखिई निर्वाचन आचारसंहिताको अवहेलना हुने गरी गरेको कार्य निर्वाचन आचार संहिता, २०७२ को दफा १० विपरीत भए गरेको पुष्टि हुन आएको हुँदा निर्वाचन आचारसंहिता उल्लंघन गरेबापत कारबाही हुनु पर्ने हो, होइन ? पत्र प्राप्त भएको मितिले २४ घन्टाभित्र जवाफसहित आयोगमा उपस्थित हुन संस्कृति, पर्यटन तथा नागरिक उड्डयनमन्त्रीलाई स्पष्टीकरण सोध्ने ।’’