काठमाडौ, १६ असार । संवैधानिक परिषदले सर्वोच्च अदालतका कायममुकायम प्रधानन्यायाधिश गोपालप्रसाद पराजुलीलाई प्रधानन्यायाधिशमा सिफारिस गरेको छ ।
बिहीबार बसेको संवैधानिक परिषद बैठकले कायम मुकायम प्रधानन्यायाधिश पराजुलीलाई प्रधानन्यायाधिशमा सिफारिस गर्ने निर्णय गरेको हो । कायममुकायम प्रधानन्यायाधिश पराजुलीलाई प्रधानन्यायाधिशमा सिफारिस गर्ने प्रधानमन्त्री शेरबहादुर देउवाको प्रस्ताव सर्वसम्मतिले पारित भएको परिषदका सदस्य एवम् उपसभामुख गंगाप्रसाद यादवले जानकारी दिनु भयो । यसअघि बसेको परिषद बैठकमा प्रतिपक्षी दलका नेता केपी शर्मा ओलीले पराजुलीलाई प्रधानन्यायाधिशमा सिफारिस गर्ने प्रस्तावबारे आवश्यक राय लिन भन्दै केही समय माग गर्नु भएको थियो । तर आज विपक्ष दलका नेता ओलीले नै कायममुकायम प्रधानन्यायाधिश पराजुलीलाई प्रधानन्यायाधिशमा सिफारिस गर्ने प्रस्ताव गर्नु भएको उपसभामुख यादवले जानकारी दिनु भयो ।
कायममुकायम प्रधानन्यायाधिश पराजुलीलाई प्रधानन्यायाधिशमा सिफारिस गर्ने संवैधानिक परिषदको निर्णय संसदीय सुनुवाई विशेष समितिले अनुमोदन गर्नुपर्नेछ । संसदीय सुनुवाई विशेष समितिले नाम अनुमोदन गरेपछि राष्ट्रपति विद्या भण्डारीले पराजुलीलाई प्रधानन्यायाधिशमा नियुक्त गर्ने संवैधानिक व्यवस्था छ । यसअघि कायममुकायम प्रधानन्यायाधिश पराजुली उमेर विवादमा तानिनु भएको थियो । तत्कालीन प्रधानन्यायाधिश सुशीला कार्कीले उमेर हदका कारण स्वेच्छिक अवकाश पाएपछि पराजुलीलाई कायममुकामय प्रधानन्यायाधिशको जिम्मेवारी दिइएको छ ।