काठमाडौं, ३० जेठ । प्रधानमन्त्री बालेन्द्र शाहले दार्चुलामा रहेको अपी हिमाल बेस क्याम्पको भिडियो सामाजिक सञ्जालमा पोस्ट गरेपछि जेनजी अभियान्ताले कटाक्ष गरेका छन्।

शनिबार बिहान प्रधानमन्त्रीले अपी हिमाल बेस क्याम्पमा क्रिकेट खेलिरहेको भिडियो फेसबुकमा पोस्ट गरेका थिए। भिडियोमा उनको गीत ‘जय महाकाली’को संगीत रहेको छ।

प्रधानमन्त्री शाह पछिल्लो समय नेपाल भारत सीमा सम्बन्धित संसदमा दिएको अभिव्यक्तिको कारण आलोचनामा परेका छन्। यसै सन्दर्भलाई जोड्दै अन्सारीले ‘जनताको आवश्यकता आग्रा तिर प्रधानमन्त्री ज्यूको ध्यान प्राथमिकता गाग्रा तिर’ भन्दै टिप्पणी गरेका छन्।

अन्सारीले सुस्ता र अपी हिमाल नेपालको फरक भौगोलिक क्षेत्रमा पर्ने भन्दै प्रधानमन्त्रीले विषयान्तर रहेको बताएका हुन् । उनले लेखेका छन्,‘ सुस्ता नेपालको मध्य मधेशको दक्षिणी भागमा पर्छ अनि अपी हिमाल बेस क्याम्प नेपालको उत्तर पश्चिम हिमाली भूभागमा पर्छ भनी सम्झाई दिनु भएकोमा सम्माननीय प्रधानमन्त्री ज्युलाई पुन हार्दिक धन्यवाद। ’

उनले थप लेखेका छन्, ‘जनताको आवश्यकता आग्रा तिर प्रधानमन्त्री ज्यूको ध्यान प्राथमिकता गाग्रा तिर। विषयान्तर गर्नमा एक्दमै माहिर हुनुहुन्छ हाम्रो प्रधानमन्त्री ज्यू। ’

उनले यस्तो रणनीति दीर्घकालीन रूपमा प्रभावकारी नहुने भन्दै दिर्घकालीन सोच राख्न सुझाव दिएका छन्।