वीरगन्ज,३२ असार । वीरगन्ज महानगरपालिकाका २५ जना किशोरीहरुले बालविवाह नगर्ने – गर्न नदिने तथा दाइजो नलिने र नदिने लिखित प्रतिबद्धता जनाएका छन् ।

वीरगञ्ज महानगरपालिकामा शुक्रबार आयोजित किशोरीहरुका लागि बालविवाह तथा दाइजो प्रथाविरुद्धको अभिमुखिकरण एवं प्रतिबद्धता कार्यक्रममा उनीहरुले त्यस्तो प्रतिबद्धता जनाएका हुन् ।

कार्यक्रममा सहभागी १२ देखि १९ वर्ष उमेर समूहका २५ जना किशोरीहरुले बालविवाह तथा दाइजो प्रथाविरुद्ध प्रतिबद्धता जनाएको युवालयका सदस्य एवं कार्यक्रमका प्रशिक्षक जया शाहले जानकारी दिए ।

‘बालविवाह र दाइजो प्रथाले समाजमा पारिरहेको असरका बारेमा हामीले उनीहरुलाई बुझायौं । त्यसपछि किशोरीहरुले बाल विवाह नगर्ने, गर्न नदिने, दाइजो नलिने लिन नदिने प्रतिबद्धता पत्रमा हस्ताक्षर नै गरेका छन्,’ उनले भने, ‘उनीहरुले लिखित प्रतिबद्धतालाई व्यवहारमै उतार्ने संकल्प समेत गरे । सुरुमा यस्तो निर्णय लिँदा पारिवारिक समस्या आउने भएपनि पछि सबै पक्षको साथ पाएपछि त्यसले सार्थकता पाउने उनीहरुको भनाइ छ ।

वीरगञ्ज महानगरपालिका क्षेत्रमासमेत बालविवाह र दाइजो जस्ता कुप्रथा विद्यमान रहेकोले किशोर, किशोरी, उनीहरुको अभिभावक र अन्य सरोकारवालाहरुलाई सचेत बनाउँदै बालविवाह र दाइजो प्रथा निर्मुल पार्न कार्यक्रम सञ्चालन गरिएको शाहले बताए ।

कार्यक्रम मार्फत वीरगञ्ज महानगरका १५ वटा वडामाप्रति वडा ३५ जनाका दरले किशोर किशोरी र उनीहरुका अभिभावकलाई सचेत बनाउने, ५ वटा वडामा घरदैलो तथा प्रतिबद्धता लिने काम गराउने बाल अधिकार सम्बर्द्धन अभियान समितिका अध्यक्ष राहुल शाहले बताए ।

अभिमुखीकरण कार्यक्रममा वीरगञ्ज महानगरपालिकाका उप प्रमु्ख शान्ति कार्की, प्रमुख प्रशासकीय अधिकृत भिष्म कुमार भुषाल, अधिकृत मुकेश गुप्ता लगायतले २० वर्ष उमेर नपुगी विवाह नगर्न र दाइजो नलिने प्रतिबद्धता व्यवहारिक रुपमा कार्यान्वयन गर्न आग्रह गरेका थिए ।