काठमाडौं, ११ माघ । उच्च अदालतका नवनियुक्त चार जना मुख्यन्यायाधीशहरुले बिहीबार पद तथा गोपनियतको सपथ लिनु भएको छ ।

प्रधानन्यायाधीश गोपालप्रसाद पराजुलीले बिहीबार उच्च अदालतका चार जना नवनियुक्त मुख्य न्यायाधीशहरु नहकुल सुवेदी, उदयप्रकाश चापागाँई, यज्ञप्रसाद बस्याल र हरिकुमार पोखरेललाई पद तथा गोपनियताको सपथ गराउनुभएको हो ।

नवनियुक्त मुख्य न्यायायाधीश सुवेदीलाई उच्च अदालत तुलसीपुर, चापागाईंलाई उच्च अदालत जनकपुर, बस्याललाई उच्च अदालत दिपायल र पोखरेललाई उच्च अदालत, सुर्खेत पदस्थापन पनि गरिएको छ ।

यसअघि सुवेदी सर्वोच्च अदालतको मुख्य रजिष्ट्रार, चापागाईं उच्च अदालत जनकपुरको न्यायाधीश, बस्याल उच्च अदालत जनकपुर विरगंज इजलासको न्यायाधीश र पोखरेल उच्च अदालत तुलसीपुर बुटवल इजलासको न्यायाधिश पदमा कार्यरत रहनु भएको थियो ।

न्याय परिषद्को पुस २० गते बसेको बैठकले चारै जनालाई उच्च अदालतको मुख्य न्यायाधीशमा नियुक्त गर्ने निर्णय गरेको थियो । सपथग्रहण समारोहमा कानुन, न्याय तथा संसदीय मामिला मन्त्री यज्ञबहादुर थापा, सर्वोच्च अदालतका न्यायाधिशहरु, नेपाल बार एशोसिएसनका पदाधिकारीलगायतको सहभागिता रहेको थियो ।