काठमाडौं २१ पुस काठमाडौं । बहुचर्चित र विवादित राष्ट्रियसभा निर्वाचन माघ २४ गते हुने भएको छ । मन्त्रिपरिषद्को शुक्रबार बसेको बैठकले निर्वाचन आयोगको परामर्शमा चुनावको मिति माघ २४ लाई तोकेको हो ।

यस अघि नै निर्वाचन आयोगले माघ २५ को मिति प्रस्ताव गरेकोमा बाम गठवन्धनले चांडो गर्नु पर्ने धारणा राखेको थियो ।
५९ सदस्यीय राष्ट्रियसभाका ५६ जना, प्रत्येक प्रदेशबाट ८, ८ जना, ७ प्रदेशबाट चुनिनेछन् । मन्त्रिपरिषदको सिफारिशमा तीन जना राष्ट्रपतिले मनोनित गर्ने व्यवस्था छ ।

राष्ट्रियसभामा प्रदेशसभा सदस्य र स्थानीय तहका प्रमुख र उपप्रमुख मतदाता हुनेछन् ।
संघीय ससंदको उपल्लो सदनको निर्वाचन एकल संक्रमणीय र बहुमतीय दुबै प्रक्रियाबाट हुनेछन् । खुला सदस्य र महिला गरी ४२ जना एकल संक्रमणीयबाट चुनिनेछन् भने दलित र अपाङ्ग तथा अल्पसंख्यक १४ जना बहुमतीयबाट चयन हुन हालै जारी अध्यादेशमा व्यवस्था गरिएको छ । राष्टिय सभा गठन हुन माघ मसान्त सम्म लाग्ने भएकाले फागुन दोस्रो हप्ताभन्दा पहिलो नयां सरकार गठन हुने सम्भावन टरेको छ ।