सप्तरी, २१ जेठ । जिल्ला मालापोत कार्यालय सप्तरीको तामेली भवनमा रहेको सम्पूर्ण कागजातहरु सार्न लागिएको छ । भवन जिर्ण र वर्षामा चुहिने कारण देखाउँदै उक्त कागजातहरु नयाँ स्थानमा सार्न लागिएको हो ।

बि.सं.२००४ सालदेखी उक्त भवनमा जग्गा सम्बन्धी विभिन्न किसिमका अत्यन्त महत्वपूर्ण कागजातहरु रहेका छन् । जिल्ला अदालत राजविराजको भवनसँगै टाँसिएर रहेको तामेली भवनको कागजातहरु अफिसर्स क्लब राजविराजको सभाकक्षमा सारिँदै छ ।

यता तामेली भवन खाली गर्न अहिले तामेली भवनमा रहेका कागजातहरु सारिने काम भइरहेको सो फाँट हेर्ने सुमन यादवले जानकारी दिएका छन् । तर, उनले हाल भवनमा रहेको २००४ सालदेखीको नम्बरी जग्गाको कागजातहरु, २०२८ सालका जिम्दार पटवारीले बुझाएको १ नं. फारम, २ नं. फारम र २८ सालको ६ नं. फारम, २००४ को नापी अनुसार २०२८ को नापी हुँदा अधिकांश जग्गाको लालपूर्जा र गाउँ ब्लकमा रहेको २००४ देखी हालसम्मको कागजात गाउँ ब्लक, पोखरी, डगर, मठ, मन्दिरको श्रेस्ताहरु समेत रहेकोले सो कागजातहरु हालको नयाँ स्थानमा नअट्ने गुनासो गरे ।

५ लाख मिशिल, १० लाख राजिनामा लिखत, ४ सय ५६ मौजाको साविक श्रेस्ताहरु समेत सोही भवनमा रहेकोले नयाँ भवनमा व्यवस्थित रुपले मिलाएर राख्न सम्भव समेत नरहेको उनले गुनासो पोखे । पुरानो भवनमा रहेका कतिपय महत्वपूर्ण कागजातहरु पानी चुहिएका कारण कुहिएको तथा कोठा जिर्ण भएको हुँदा आफै नष्ट भएको छ ।

बि.सं. १९९८ सालमा निर्मित उक्त भवनमा लामो समयसम्म मालापोत कार्यालय संचालन रहेको थियो । भवन जिर्ण भएको भन्दै मालपोत कार्यालय भाडाको घरमा संचालन हुँदै आएको थियो । तर, २०५९ साल साउन महिनादेखी आफ्नै भवनमा मालपोत कार्यालय हालसम्म संचालनमा रहेको छ ।

तत्कालिन मालपोत कार्यालयका निमित्त प्रमुख सरयुगलाल दासको कार्यकालमा भूमि सुधार तथा व्यवस्थापन विभागको २०६७ जेठ ३१ गतेको निर्णय अनुसार हाल तामेली भवनसहितको २ कठा १ धुर जग्गा जिल्ला अदालतको नाउँमा लिखित सहमति हस्तान्तरण गरिदिएका थिए । सोही लिखित सहमति अनुसार अहिले जिल्ला अदालतले कार्यालय प्रयोजनका लागि भवन र जग्गा खाली गर्न बारम्बार दबाब सृजना गरेको श्रोतको दाबी छ ।

यस सम्बन्धमा जिल्ला मालपोत कार्यालय सप्तरीका प्रमुख दधिराम गुरागाईले तामेली राख्ने भवन बि.स. २०६६ सालदेखी जिर्ण रहेको र कतिपय कागजातहरु नष्ट भइसकेको जानकारी दिएका छन् । उनले हालको मालपोत कार्यालयको माथिल्लो तल्लामा निर्माणाधिन कोठाहरुमा कागजातहरु राख्न नमिल्ने बताए ।

तामेली भण्डारणका लागि जिल्ला अदालतले मालापोत कार्यालयलाई ४६ लाख रुँपैया उपलब्ध गराएको थियो । सोही रकमले हाल रहेको मालपोत कार्यालयको माथील्लो तल्लामा टिनको छानाको भएको कोठा निर्माण गरिएको छ । तर, सो कोठाहरु गुणस्तरहीन रहेकोले त्यहा तामेली भण्डारण गर्न नसकिने अवस्थामा रहेको छ । हावाहुरी तथा पानी परेको अवस्थामा सो कोठाहरु चुहिने तथा कागजातहरु हावाले उडाउन सक्ने सम्भावना रहेको छ ।