काठमाडौँ, ५ चैत । जनमत पार्टीका अध्यक्ष सिके राउतले १० दलीय सत्ता गठबन्धनको बैठकमा तीन माग राखेका छन् । शनिबार प्रधानमन्त्री निवास बालुवाटारमा बसेको १० दलीय बैठकमा अध्यक्ष राउतले पार्टीको तर्फबाट प्रधानमन्त्री पुष्पकमल दाहाल ‘प्रचण्ड’सँग तीन माग राखेका हुन् ।

मधेस आन्दोलनका सहिदहरूको नाम पनि राजपत्रमा प्रकाशित गर्नुपर्ने उनको माग छ ।

मलको बढ्ने मूल्यलाई कम गर्न पहल गर्न पनि राउतले माग राखेका छन् । यस्तै, तेस्रोमा नागरिकता विधेयकमा तत्काल विवाद नहुने प्रावधानहरू मात्रै राखेर भए पनि टेबल गर्नुपर्ने माग राखेका हुन् ।

“ नागरिकता विधेयकमा तत्काल विवाद नहुने प्रावधानहरू मात्रै राखेर भए पनि अविलम्ब टेबल‌ गरिनु पर्ने र जन्मसिद्धका सन्तानहरूले भोगी राखेको नागरिकता समस्या समाधान गर्नुपर्ने विषय जनमत पार्टीको तर्फबाट उठाएको छु,” बैठकमा राखेको मागबारे सामाजिक सञ्जालमा उनले लेखेका छन् ।

उक्त बैठकले आइतबार प्रस्तुत गर्ने ‘बेपत्ता व्यक्तिको छानबिन र सत्य निरूपण तथा मेलमिलाप आयोग ऐन २०७१ लाई संशोधन गनै बनेको विधेयक’मा पनि एकमतका साथ अघि बढ्ने र सोमबार प्रधानमन्त्री प्रचण्डलाई विश्वासको मत दिने सहमति पनि जनाउने भएको हो ।

सत्ता साझेदार दलहरू नेकपा (माओवादी केन्द्र), नेपाली कांग्रेस, नेकपा (एकीकृत समाजवादी), जनमत पार्टी, राष्ट्रिय जनमोर्चा, नागरिक उन्मुक्ति पार्टी, जनता समाजवादी पार्टी, लोकतान्त्रिक समाजवादी पार्टी, नेपाल समाजवादी पार्टी र आम जनता पार्टी छन् ।