काठमाडौं,२९ बैशाख । नेविसंघले त्रिुभवन विश्वविद्यालयको कीर्तिपुरस्थित सेवा आयोग कार्यालय तोडफोड गरेका छन् । खुला प्रतिस्पर्धा परीक्षामा नातेदारलाई पास गरेको भन्दै उनीहरुले त्रिुभवन विश्वविद्यालय सेवा आयोग कार्यालय तोडफोड गरेका हुन ।
घटनामा संलग्न नेविसंघ त्रिवि इकाइका सचिव योगेन्द्र रावलसहित पाँच जनालाई प्रहरीले पक्राउ गरेको प्रहरीले बताएको छ । पक्राउ परेकाहरु नेविसंघ र नयाँ शक्ति आवद्ध विद्यार्थी रहेको महानगरीय प्रहरी वृत्त कीर्तिपुरले जनाएको छ।
विद्यार्थीहरुले आयोग अध्यक्ष चैतन्य शर्माको कुर्सी जलाएका छन् । ‘तोडफोडबाट त्रिवि सेवा आयोग कार्यालयका झ्यालका सिसा फुटेका छन् । सेवा आयोगले लिएको खुला प्रतिस्पर्धामा आयोग अध्यक्ष, त्रिविकै उच्च अधिकारी, विद्यार्थी संगठनका नेता र पार्टीका नेताका नातेदारहरुको नाम निस्किएको उनीहरुको आरोप छ ।
त्रिविका कर्मचारी संघ-संगठन र परीक्षामा सहभागी केही विद्यार्थीले आयोग, केन्द्र, कुलपति, उपकुलपति कार्यालयलगायत त्रिविकै विभिन्न निकायमा समेत उजुरी दिएका छन । नतिजा वैशाख १३ मा सार्वजनिक भएको थियो ।
लिखित परीक्षामा उत्तीर्ण हुनेमा धेरैजसो पहुँचवालाका आफन्त परेपछि अख्तियार दुरुपयोग अनुसन्धान आयोग र राष्ट्रिय सतर्कता केन्द्रमा समेत यसबारे उजुरी परेको छ ।
प्रतिक्रिया दिनुहोस्