दमक, ५ माघ ।  प्रदेश १ का मुख्यमन्त्री शेरधन राईले देशलाई समृद्धितर्फ अगाडि लैजान कृषि र पर्यटनको प्रवद्र्धन आवश्यक रहेको औँल्याउनुभएको छ ।

झापाको दमकस्थित हिमशिखर मिडिया ग्रुपको आज नवौँ वार्षिकोत्सव कार्यक्रमलाई सम्बोधन गर्नुहुँदै उहाँले देशको विकास र समृद्धिको यात्रामा सञ्चार क्षेत्रको पनि महत्वपूर्ण साथ चाहिने धारणा व्यक्त गर्नुभयो ।

देशको विकास र समृद्धिका लागि कृषि तथा पर्यटन क्षेत्रको व्यावसायीकरण गर्न खाँचो रहेकामा जोड दिँदै उहाँले देशलाई समृद्धिमा रुपान्तरण गर्न प्रदेश सरकार गम्भीर रहेको बताउनुभयो ।

उहाँले सञ्चारमाध्यमलाई बलियो बनाउन प्रदेश सरकार प्रयत्नशील भएकोसमेत जानकारी दिनुभयो । मुख्यमन्त्री राईले भन्नुभयो, “कृषिको आधुनिकीकरण र व्यवसायीकरण गर्न प्रदेशको अवस्था अत्यन्तै उपयोगी छ ।”

उहाँले कृषिसँगै पर्यटनका प्रचुर सबै क्षेत्रको विकास गरेर सबै क्षेत्रको प्रवद्र्धनबाट प्रदेश सवल र समृद्ध बन्न सक्ने बताउनुभयो ।

सो अवसरमा उहाँले दमक–५ मा उक्त मिडिया ग्रुपको नवनिर्मित भवनकोसमेत उद्घाटन गर्नुभयो । कार्यक्रममा प्रदेशसभा सदस्य झलकसिंह दर्लामी, मिडिया गु्रपका सञ्चालक तथा उद्योगी भोलेश्वर दुलाल, नेपाल पत्रकार महासङ्घ प्रदेश अध्यक्ष विक्रम लुइँटेललगायतले मिडिया गु्रपको वार्षिकोत्सवको शुभकामना मन्तव्य राख्नुभएको थियो ।