दाङ, १६ कात्तिक । प्रदेश ५ का द्वन्द्व पीडितहरुले आफुहरुले न्याय कुरिरहेको बताएका छन् । नागरिक आवाजले दाङमा आयोजना गरेको महिला शान्ति सम्वाद कार्यक्रममा सहभागि प्रदेश ५ का द्वन्द्वपीडित महिलाहरुले लामो समय देखि आफुहरु न्यायको लागि दौडिरहेको भएपनि न्याय नपाएको गुनासो गरेका थिए ।

द्वन्द्वको समयमा शहिद भएका, बेपता पारिएका, घाईते भएका, यातना पाएका महिलाहरुले न्यायका लागि बर्षौदेखि सम्बन्धित निकायमा धाएपनि कुनै न्याय पाउन नसकेको गुनासो गरेका छन् ।

द्वन्द्वको समयमा बेपत्ता पारिएका परिवारले अझै पनि बेपता पारिएका ब्यक्ति आउछन, की भन्ने आशा गरिरहेको बर्दियाकी द्वन्द्वपीडित जुना सापकोटाले बताईन् । ‘राती कुकुर भुक्दा समेत मेरो मान्छे आयो की भनेर हेर्छौ’ उनले थपिन् ‘ बजारमा उस्तै कोही मान्छे देख्दा पनि आफ्नै मान्छे हो की भनेर घोरिएर हेर्नुपर्ने अबस्था छ ।’

द्वन्द्वपीडितका समस्या समाधान गर्न भनि सरकारी तथा बिभिन्न प्रयास भएपनि अझै समस्या समाधान हुन नसकेको दाङकी द्वन्द्व पीडित गीता पौडेलले गुनासो गरिन् ।

त्यस अवसरमा द्वन्द्व पीडित साझा चौतारी प्रदेश ५ का संयोजक चन्द्रकला पराजुलीले द्वन्द्वपीडित महिलाहरुका लागि प्रदेश सरकारले विशेष कानुनको व्यबस्था गरि कार्यान्वनयका लागि पहल थाल्नु पर्ने, पीडितका बालबालिकाहरुलाई निःशुल्क शिक्षा प्रदान गर्ने ब्यबस्था मिलाउनुपर्ने, यातना पीडित, विस्तापित तथा यौनजन्य हिंसामा परेका महिलाहरुका लागि छुट्टाछुट्टै कानुनको निर्माण गर्नुपर्ने, पीडित महिलाहरुका लागि सुरक्षित आवाजको निर्माण, रोजगारीमा पहलगर्नुपर्ने बताईन् ।

त्यस्तै स्थानीय तहमा रहेका द्वन्द्वपीडितहरुको तथ्याङ्क संकलन गर्नुपर्ने, पीडित महिलाहरुलागि आकस्मिक कोषको व्यवस्था, परिचय पत्रको व्यबस्था, निःशुल्क उपचारको व्यबस्था, सीप मुलक तालिमको व्यबस्था हुनुपर्ने बताईन् ।

त्यस अवसरमा सत्य निरुपन तथा मेलमिलाप आयोग प्रदेश ५ को मुकाम कार्यालय दाङका विज्ञ सदस्य नारायण प्रसाद धितालले कर्मचारी समस्याले गर्दा समयमै काम गर्न नसकेको स्वीकार गरिन् ।

त्यस्तै मुकामकै विज्ञ सदस्य सीता आचार्यले प्रदेश ५ का एक हजार सात सय फाईल मध्य चारसय १८ वटा फाईल प्रारम्भीक अध्ययन गरि केन्द्रमा पठाएको बताईन् ।प्रदेश ५ कौ १२ जिल्लाका द्वन्द्वपीडित महिलाहरुले न्याय र आत्म सम्मानका लागि सरोकारवाला जिम्मेवार निकायले ध्यानमा राखि तत्काल कदमहरु चाल्नुपर्ने बताईन् ।