सदरमुकामस्थित कृष्णचौकमा भ्रष्ट्राचार र मदिराविरुद्ध जनसंस्कृतिक कार्यक्रम गरिरहेका नेकपा कार्यकर्ता र प्रहरीबीच शुक्रबार झडप भएको हो । नेकपाले पूर्वस्विकृति नलिएर कार्यक्रम गर्दै गर्दा सम्झाएर रोक्न खोज्दा प्रहरीमाथि आक्रमण भएको प्रहरीको भनाइ छ ।

झडपमा प्रहरी सहायक निरीक्षक देवेन्द्रसिंह धामी घाइते भएका छन् । घाइते धामीको टाउँको चोट लागेको छ । चौकमा गरिएको कार्यक्रम रोक्न खोज्दा नेकपा कार्यकर्ताले प्रहरीमाथि ढुङ्गामुढा गरेका थिए ।

प्रहरी र नेकपाका कार्यकर्ताबीच झडप भएपछि प्रहरीले एक राउण्ड अश्रु ग्याससमेत प्रहार गरेको थियो । प्रशासनलाई जानकारी नै नदिएर कार्यक्रम गरेका नेकपाका कार्यकर्तालाई सम्झाइ–बुझाइ गर्न खोज्दा झडप भएको जिल्ला प्रहरी कार्यालय मुगुका डिएसपी भीमकिरण बोगटीले बताए । उनका अनुसार नेकपाका पूर्वजिल्ला इन्चार्ज जंगवीर परियारसहित पाँच जना कार्यकर्तालाई प्रहरीले नियन्त्रणमा लिएको छ ।