काठमाडौं, २७ चैत । गृहमन्त्री रामबहादुर थापा ‘बादल’ले पछिल्ला दिनहरुमा धार्मिक आवरणमा अस्थिरता निम्ताउन खोज्नेहरु सक्रिय भएको भन्दै उनीहरुलाई सरकारले कारवाहीको दायारमा ल्याउने स्पष्ट पार्नुभएको छ ।

गत आईतबार बिराटनगरमा श्रीनिवास आचार्यमाथि भएको गोलि प्रहारको घटनामा संलग्नहरुलाई कारवाहीको माग गर्दै आज गृहमन्त्रालयमा बिभिन्न ४८ वटा धार्मिक संघसंस्थाका तर्फबाट ज्ञापनपत्र बुझाउन आएको प्रतिनिधिमण्डलसँग गृहमन्त्री थापाले घटनामा संलग्न भएको आरोपमा दुई जना पक्राउ परिसकेको र अन्यबारे खोजविन जारी रहेको बताउनुभयो ।
सो घटनाले आफुलाई दुखित तुल्याएको भन्दै थापाले घटनामा संलग्नहरुको पहिचान गर्न र कारवाहीको दायरामा ल्याउन आफुले सुरक्षा निकायलाई निर्देशन दिईसकेको जानकारी दिनुभयो ।

उहाँले भन्नुभयो, ‘‘जातीयता र धर्मको नाममा सबैलाई जुधाएर देशलाई अस्थिरतातर्फ लैजान केही तत्व सक्रिय भएका छन्, उनीहरुलाई कारवाहीको दायरमा ल्याईनेछ ।’’

प्रतिनिधिमण्डलको माग बमोजिम घाईते आचार्यको उपचारको खर्च सरकारले व्यहोर्न आवश्यक प्रक्रिया अगाडि बढाउने समेत उहाँले बताउनुभयो ।

प्रतिनिधमण्डलले घटनामा संलग्नलाई कारवाही गर्नुपर्ने, घटनाको छानविन गर्न आयोग गठन गरिनुपर्ने, सनातन हिन्दु धर्म माथिको आक्रमण रोकिनुपर्ने, घाईते आचार्यको उपार खर्च सरकारले व्यहोर्नुपर्ने लगायतका माग राखेका थिए ।