काठमाडौं । प्रधानन्यायाधीश गोपाल पराजुलीले न्यायलयलाई स्वच्छ, निष्पक्ष र सरल ढंगले जनतामाझ पुराउने प्रतिवद्धता जनाएका छन् ।

गत सोमबार पद तथा गोपनीयताको सपथ लिएका पराजुलीले पहिलो पटक एबीसी न्युजसँग कुरा गर्दै न्यायालयलाई निष्पक्ष ढंगले जनतामाझ पुर्याउने प्रतिवद्धता जनाएका हुन् ।

प्रधानन्यायाधीश गोपाल पराजुलीले संविधानले दिएको निष्पक्ष, सुलभ, न्याय जनताको पहुँच, जनताले अनुभुति गर्ने न्याय र पद्धतिलाई परिचालित गर्ने आफ्नो मुल उद्देश्य रहेको बताएका छन् ।

पराजुलीले न्यायालय सुधारका लागि थुप्रै प्रतिवेदन अदालतमा रहेको भन्दै अहिलेको ठुलो समस्या धेरै पुरानो मुद्दाहरु भएको जानकारी दिए ।

प्रधानन्यायाधीश पराजुलीले छिटो छरितो न्यायका सम्बन्धमा एउटै विषयको उस्तै विषयसँग र उस्तै नजिर भएका मुद्दाहरुलाई एकैचोटी एउटै बेन्चबाट फैसला गर्ने व्यवस्था मिलाउने बताए ।

स्मार्ट न्यायापालिकाको अवधारणा अगाडि बढाउदै पराजुलीले मुद्दा दर्ता, तारेख, थुनुवाका आफन्तलाई सूचना दिने काम अनलाईनबाटै गर्ने र भिडियो कन्फरेन्सिङबाट बकपत्र गराउने बताए । पराजुलीले बार र बेन्च एकै सिक्काका दुई पाटा भएकाले दुवैले न्यायालयका लागि लड्ने बताए । प्रत्येक नागरिकले आफ्नो भाषामा इजलासमा गएर आफ्ना कुरा राख्न पाउने भन्दै भाषामा समस्या भएकाहरुलाई १९ वटा भाषा अनुवादक राखेको जानकारी दिए ।

एउटै प्रकृतिका मुद्दाहरु एउटै बेन्चबाट फैसला हुनेभएपछि सर्वसाधरण न्यायका लागि वर्षौ कुर्नुपर्ने बाध्यता हट्नेभएको छ ।