काठमाडौं ,२७ माघ । स्वतन्त्र न्यायपालिका र कार्यपालिका विरुद्ध जथाभावी बोल्दै हिंड्ने जो कोहीलाई पनि छुट दिन नहुने नागरिक अगुवाहरुले बताएका छन् । पछिल्लो समय न्यायपालिका माथि भईरहेको आक्रमणको विरुद्ध एक जुट हुनुपर्ने आवाज उठाउँदै नागरिक समाजका केही व्यक्तिहरुले यस्तो कुरा बताएका हुन् ।
कार्यपालिका, न्यायपालिका र व्यवस्थापिका बीचको शक्ति सन्तुलनलाई समेत हस्तक्षेप हुन नदिन उनीहरुले माग गरेका छन् । राजधानीको माइतीघर मण्डलामा बाह्र वटा संघ संस्थाहरुबाट आयोजना गरिएको संयुक्त सभामा बोल्दै वक्ताहरुले न्यायपालिकाको गरिमा जोगाउनु पर्ने बताए । कानुन भन्दा माथि कोही पनि नभएको जिकिर गर्दै उनीहरुले कानुनी राज्यको स्थापनामा जोड दिन माग गरेका छन् ।
न्यायपालिकाका विरुद्ध मिडियामा दुष्प्रचार बढेको भन्दै उनीहरुले न्यायपालिकाको गरिमा बढाउन सबैको ध्यानाकर्षण गराएका छन् । स्वतन्त्र न्यायपालिकाको सिद्धान्त विपरीत केही व्यक्तिहरुले सस्तो लोकप्रियताका लागि अदालतका विरुद्ध वक्तव्य बाजी गर्दै हिंडेको भन्दै नागरिक समाजका अगुवाहरुले सरकार समक्ष ज्ञापन पत्र समेत बुझाएका छन् ।
सस्तो लोकप्रियताका लागि केही बुद्धिजिवी भन्नेहरुले न्यायलय विरुद्ध बारम्बार उत्तेजित भाषण गरिरहेको उहाँले आरोप लगाउनु भयो । सभामा बोल्दै समाजसेवी एवं राजनीतिक विश्लेषक पदम सापकोटा, भोजराज तिमिल्सिना र युवा नेता शम्भुप्रसाद अधिकारी लगायतले न्यायपालिका माथिको हस्तक्षेप बन्द गर्नुपर्ने र कानुनी राज्य स्थापना गर्नुपर्ने बताए । युवा नेता अधिकारीले डा. गोविन्द केसी र केही कानुन व्यवसायी जस्ता व्यक्तिकै कारण कानुनको खिल्ली उड्दै गएको धारणा राख्नुभयो । न्यायलयको बर्खिलापमा हिंड्ने जो कोहीलाई पनि कारवाही गर्न उहाँले सरकारको ध्यानाकर्षण गर्नुभयो कार्यक्रम पछि सामाजिक न्याय र स्वतन्त्रताका लागि संयुक्त राष्ट्रिय महाअभियानले न्यायपालिका विरुद्ध भईरहेको गतिविधि तुरुन्त रोकी दोषीलाई कडा भन्दा कडा सजाय दिनुपर्ने माग राखी प्रधानमन्त्री समक्ष ज्ञापन पत्र बुझाएको छ । यस महाअभियानका संयोजक भोजराज तिमिल्सिनाद्धारा हस्ताक्षरित ज्ञापन पत्र प्रधानमन्त्रीको कार्यालय सिंहदरबारमा दर्ता गरिएको छ ।
प्रतिक्रिया दिनुहोस्