अछाम, २४ माघ । आपूर्ति राज्यमन्त्री सुशीलकुमार श्रेष्ठले वाम गठबन्धनको बहुमत रहेकाले स्वभाविकरुपमा अबको सरकार वाम गठबन्धनले चलाउनुपर्ने बताए ।

राप्रपा अछामको अगुवा कार्यकर्ता भेलालाई कमल बजारमा आज सम्बोधन गर्दै सो पार्टीका नेता श्रेष्ठले सो कुरा बताएका हुन् । तत्कालका लागि वाम गठबन्धनले देशको नेतृत्व गरे पनि अन्ततः लोकतान्त्रिक र वाम गठबन्धन मिलेरै देशको समृद्धिमा लाग्नुपर्ने उनले विचार व्यक्त गरे ।

मन्त्री श्रेष्ठले देशमा हिन्दूराष्ट्र र राजासहितको प्रजातन्त्र स्थापनाका लागि आगामी वैशाखबाट देशैभर सशक्तरुपमा आन्दोलन गर्ने उद्घोष गरे । राप्रपा अछामका अध्यक्ष मीनबहादुर शाहीको अध्यक्षतामा भएको अगुवा कार्यकर्ता प्रशिक्षण कार्यक्रममा पार्टीका केन्द्रीय प्रवक्ता भुवन पाठक र केन्द्रीय सदस्य श्यामबहादुर शाहीले पनि समसामयिक राजनीति र पार्टीको रणनीतिका विषयमा पार्टीका अगुवा कार्यकर्तालाई प्रशिक्षण दिएका थिए ।