काठमाडौं, २२ माघ । एमाले उपाध्यक्ष बामदेव गौतमले माओवादी केन्द्रसँगको पार्टी एकतामा केही जटिल समस्याको हल नभएको खुलासा गरेका छन् । पार्टी एकताका लागि सुरुदेखि नै गृहकार्यमा लागेका गौतमले दुई पार्टी मिलाउने काम त्यति सहज नभएकै कारण समस्या आएको र त्यसलाई फुकाउने गृहकार्य जारिरहेको प्रष्ट पारेका हुन् ।

प्रेस चौतारी नेपालको २०औँ स्थापना दिवसमा आयोजित कार्यक्रममा गौतमले केही जटिल समस्या आए पनि त्यस्को गाँठो फुकाउन अध्यक्ष केपी शर्मा ओली र माओवादी अध्यक्ष पुष्पकमल दाहाल प्रचण्ड लागिपरेको र चाँडै निकास आउने जानकारी दिए ।

केही समस्या छ, चाँडै मिलाउँछौँ

नेकपा एमाले र माओवादी केन्द्रबीचको एकताको गृहकार्य भइरहँदा केही जटिल समस्या उत्पन्न भएका छन् । कुनै समस्या नभएको भए धेरै पहिला नै पार्टी एकता हुन्थ्यो । समस्या भएकै कारणले गर्दा नै अहिलेसम्म अड्किएको छ, ती समस्याका गाँठो फुकाउन दुवै अध्यक्ष लागिपर्नु भएको छ, उहाँहरू अहिले यही काममा हुनुहुन्छ । तर, हामीले एकता गर्नुको विकल्प नभएकोले ती समस्याको सहमतिका साथ हल गर्छौं, पार्टी एकताको हात्ती छिरिसक्यो, प्वालमा पुच्छर अड्किएको मात्र हो, अब त्यो पुच्छर अड्काइलाई पनि समाधान गरिन्छ ।

एकता नभए ठूलो दुर्घटना

दुई पार्टीबीचको एकता समानता र सम्मानको आधारमा हुन्छ । एकता भनेकै विचार र काम एक ठाउँमा आउने हुन् । इतिहासको विषय टुंगो नलाग्न सक्छ, कतिपय विषय भविष्यलाई छोड्दिन सकिन्छ । तर, आज गर्ने काम दुई पार्टीको उद्देश्य र लक्ष्य एउटै छ । त्यसैले मिलेर जानुको विकल्प छैन भन्नेमा दुवैतिर प्रष्ट छौँ । एमाले र माओवादीबीच अब एकता नहुने हो भने नेपालको कम्युनिस्ट आन्दोलन, प्रजातान्त्रिक आन्दोलनमा ठूलो दुर्घटना हुन्छ । हामी दुई पार्टी मिल्न सकिएन भने ठूलो मूल्य चुकाउनुपर्नेछ । अहिलेसम्मका सबै उपलब्धी गुम्न पनि सक्छन् । फेरि कम्युनिस्ट पार्टी एक भएर समृद्ध दिने काम नहुन सक्छ । यसो भनिरहँदा एकता भाँडिने अवस्थामा पुगेछ कि भन्ने आशंकाचाहीँ नगरौँ, एकता हुन्छ, दुवै पार्टीका नेतृत्वदेखि कार्यकर्तासम्म सचेत छन् । जनताले अनुमोदन गरिसकेको अवस्थामा केही समस्या आएपछि हल गर्दै अघि बढिन्छ । समस्या छन्, छलफल जारी छ, केही समयको कुरा हो, पार्टी एकता हुन्छ ।

ऐतिहासिक अवसर गुम्छ

एकताको प्रक्रियामा हामी छाँै । एकता हुन्छ–हुन्छ भनेर हामीले भनिरहेका छाँै । भएन भने यो भन्दा ठूलो दुर्घटना नेपालको कम्युनिस्ट आन्दोलनमा केही हुने छैन । हामीलाई उठ्नको निम्ति ज्यादै मिहिनेत गर्नुपर्दछ । मिहिनेत गरेर पनि हुन्छ कि हँुदैन यसै भन्न सकिँदैन । नेपालको आजको कम्युनिस्टको अवस्था चीन, भियतनाम, लाओसलाई छोडेर संसारभरिमा सबभन्दा सशक्त कम्युनिस्ट आन्दोलन हुन्छ । ल्याटिन अमेरिका युरोपको कम्युनिस्टले हाम्रो कम्युनिस्ट आन्दोलनलाई हेर्नेछ । त्यसैले अन्तर्राष्ट्रिय जिम्मेवारी पनि हाम्रो काँधमा आएको छ । माक्र्स, लेनिन, पुष्पलाल, मदन भण्डारीले सोचेको भन्दा फरक किसिमले कम्युनिस्ट आन्दोलन अगाडि गइरहेको छ । नयाँ परिवेशमा हिजो युद्ध लडेर जसरी पँुजीवादीले पराजित गरेका थिए । अहिले हामी एकता हुँदा मुलुक र जनताले सबैथोक पाउँछन् । मिल्न सकिएन भने सबै दुर्घटनाको सिकार हुन्छौँ । ऐतिहासिक अवसर गुम्छ ।

विलय होइन विलिन

पार्टी एकता भनेको दुई पार्टी एकअर्कामा विलय नभएर एकअर्कामा विलिन अर्थात् गाभिएर नयाँ शक्तिशाली पार्टी बन्ने हो । दुई वटा मिलेर नयाँ सामथ्र्यसहित निर्माण हुने हो । यसमा पनि ठूलो पार्टी एमाले धेरै जिम्मेवार हुनुपर्दछ । म आपैmँ संलग्न भएर पार्टी एकता गर्ने घोषणा गरेको हँु । त्यसको निमित्त महत्वपूर्ण भूमिका खेलेको छु, खेलिरहन्छु ।

छैटौँपटकको प्रयासमा एकता

माओवादी केन्द्रसँग जारिरहेको एकता छैटौँपटकको प्रयासस्वरूप हो । यसअघि हामीले थुप्रैपटक एकता प्रयास गरिसकेका छौँ । पहिलोपटक ०६३ मा पार्टीको केन्द्रीय कमिटीले निर्णय गरेर मलाई संयोजक बनाएर माओवादी पार्टीसँग एकता गर्न भनेको थियो । त्यो सदस्यमा विष्णु पौडेल र पछि ईश्वर पोखरेललाई राखिएको थियो । पार्टी एकता गर्न प्रचण्डसित पठाएको थियो । त्यसपछि माओवादीबाट मोहन वैद्य आउनुभयो । वैद्यले पार्टी एकता नहुने निर्णय गर्नुभयो भनेर हामीलाई भन्नुभयो । वैद्यले त्यो पनि कहीँ हुन्छ ? वार्ताका क्रममा छलफल हुँदा मोहन वैद्यले तपाईंको पार्टीसँग विचार, दर्शन, सिद्धान्त, योजना, नीति नै मिल्दैन कसरी एकता हुन्छ ? हामी कहाँ नजाने हो ? त्यो पनि मिल्दैन भन्नुभयो ।

अनि हाम्रो पार्टीका ईश्वर पोखरेलले राखेको कुरामा बखेडा झिक्दै यस्तै होे भने कसरी एकता हुन्छ भनेपछि एकता प्रयास भाँडिएको थियो । दोस्रो पटकको पार्टी एकताको लागि म थिइनँ । अरू जतिपटक भएका छन्, सबैमा सामेल भएको छु । तर, अहिलेको पार्टी एकतामा म छु । कुनै दुर्घटना भएन भने यसपटक छैटौँपटकको प्रयाशमा पार्टी एकता हुन्छ ।

एमाले बढी जिम्मेवार बन्नुपर्छ

भोलि तलमाथि भयो भने सबभन्दा ठूलो पार्टी भएको नाताले एमालेको बढी आलोचना हुनेछ । त्यही भएर एकताका लागि एमाले सबभन्दा बढी गम्भीर भएर लाग्नुपर्दछ । लागिरहेकै छ, अझै लाग्नेछ । पार्टी एकतामा ठूलो जिम्मेवारी एमालेको काँधमा रहेको छ । यो जिम्मेवारी इतिहास, जनता, पुर्खाको तर्फबाट निर्वाह गर्ने हो । विगतमा जे गरिएको छ, त्यो हँुदैन । जसरी बोलिएको छ, त्यसरी हुँदैन । पार्टी एकतामा एमाले सामेल भएकोले एमाले बढी जिम्मेवार हुनुपर्दछ । ठूलो पार्टीको हिसाबले पार्टी एकता गर्ने जिम्मेवारी एमालेको बढी छ । पार्टी एकता गर्दा धेरै दिनका लागि तयार पनि हुनुपर्छ । पार्टी एकता गर्ने जिम्मेवारी माओवादीको पनि हो । ऊ पनि जिम्मेवार हुनै पर्छ ।

केही समयमै ओली प्रधानमन्त्री

अब केही समयपछि नै शासन सञ्चालन गर्ने ठाउँमा एमाले पुग्नेछ । एमालेको अध्यक्ष केपी शर्मा ओली प्रधानमन्त्री हुनुहुनेछ । त्यो जनताको चाहना हो । जनताको त्यो चाहनालाई विदेशीलेसमेत मनन गरिसकेका छन् । यही भएर पार्टी एकता गर्न पार्टीको सम्पूर्ण पंक्ति लाग्नुपर्दछ ।

संविधानको गतल व्याख्या

प्रधानमन्त्री शेरबहादुर देउवाले निर्वाचन आयोगदलाई संविधानको गलत व्याख्या गर्न लगाएर सत्तामा बसिरहेका छन् । नत्र अहिलेसम्म वाम गठबन्धनको सरकार गठन भइसक्थ्यो । दुनियाँभरको चलन प्रतिनिधिसभाले सरकार बनाउने हो । राष्ट्रिय सभाको सरकार बनाउनका लागि एक प्रतिशत पनि भूमिका रहँदैन । तर, संविधानको गलत व्याख्या गरेर राष्ट्रिय सभाको निर्वाचन नभई सरकार बनाउन दिइएन । हामीलाई तुरुन्तै सरकार बनाउनबाट रोकिएको छ । हारिसकेपछि कुर्सी प्यारो भएको छ सरकारलाई । त्यसैले पार्टी एकता भएको छैन भनेर सरकार टाँसिएर बसेको छ ।’

भारतको प्रधानमन्त्रीको सन्देश लिएर भारतीय विदेशमन्त्री सुष्मा स्वराजको भ्रमण भएको हो । तर, स्वराजलाई मैले विशेष कारणले भेटन पाइनँ । अबको सरकारसँग भारतले राम्रो सम्बन्ध बढाउनका लागि उहाँको भ्रमण भएको हो । संसारमा नभएको काम मोदीले गर्ने गरेका थिए, पाकिस्तानको प्रधानमन्त्रीसँग अंकमाल गरेको घटनाबाटै थाहा पाउन सकिन्छ । मित्रता कायम गर्नका निम्ति भारतीय जनता पार्टी र वाम गठबन्धनले निर्माण गर्ने सरकारसँग भारत सरकारले राम्रो मित्रता कायम गर्न स्वराज आउनुभयो हो । नेपालको भावी सरकारसँग भारत सरकारले राम्रो व्यवहारको सुरुआत गर्दै मित्रताको हात राम्रो बढाउनका लागि गरिएको सन्देश हो । भारतसँग जेजति समस्या छन्, मित्रतापूर्वक हल गर्न यो भ्रमण भएको हो । सौर्य दैनिक बाट