काठमाडौँ, १ वैशाख । उपप्रधान एवम् गृहमन्त्री नारायणकाजी श्रेष्ठले काठमाडौँ महानगरपालिकाले सिंहदरबार, शीतल निवास र बालुवाटारको फोहोर उठाउँदिनँ भन्न नमिल्ने दोहोर्‍याएका छन् ।

श्रद्धेय धम्मवती गुरूमाँ विशेष सामूहिक धम्कपूजा आयोजना समितिले शुक्रबार काठमाडौँमा आयोजना गरेको एका कार्यक्रममा बोल्दै उपप्रधानमन्त्री श्रेष्ठले यस्तो बताएका हुन् । कुनै एउटा सन्दर्भलाई लिएर काठमाडौँ महानगरपालिकाका मेयर बालेन्द्र साह (बालेन)ले भनेको प्रसंगलाई उद्धृत गर्दै उनले त्यसो भन्न मिल्छ कि मिल्दैन ? भनेर सोचिदिन पनि आग्रह गरे । यसअघि गएको सोमबार चितवनमा सञ्चारकर्मीसँग कुरा गर्दै उनले काठमाडौँका मेयरले सिंहदरबारको फोहोर उठाउँदिनँ भन्न मिल्छ ? भनेर प्रश्न गरेका थिए ।

“काठमाडौँ महानगरपालिकाले कुनै एउटा सन्दर्भलाई लिएर सिंहदरबारको फोहोर नउठाउने, राष्ट्रपति कार्यालयको फोहोर उठाउँदिनँ, बालुवाटारको फोहोर उठाउँदिनँ भन्न मिल्ला कि नमिल्ला ? एकचोटी यसो छातीमा हात राखेर सोचिदिनु भए धेरै गसण लाग्थ्यो,” उनले भने ।

संघीयस सरकारले सहयोग नगरेको भन्दै मेयर साहको निर्देशनमा सिंहदरबारको फोहोर उठेको छैन । महानगरपालिकाले फोहोर नउठाएपछि मन्त्रिपरिषद्को बैठकले सिंहदरबारको फोहोर उठाउने जिम्मेवारी महानगरपालिकाकै भएकाले जिम्मेवारीबाट पन्छिन नमिल्ने जनाएको छ ।