काठमाडौँ, ८ फागुन । नेकपा (एमाले)का अध्यक्ष केपी शर्मा ओलीले आफ्नो पार्टीले उठाएको उम्मेदवार नै राष्ट्रपति पदमा निर्वाचित हुने बताएका छन् । आइतबार विराटनगरमा सञ्चारकर्मीहरूसँग कुराकानी गर्दै अध्यक्ष ओलीले एमालेले उठाएको उम्मेदवार नै राष्ट्रपतिमा निर्वाचित हुने दाबी गरेका हुन् ।

हालको सत्ता गठबन्धन जन्मदाखेरि नै गठबन्धनको जन्मकुण्डलीमा राष्ट्रपति कुन पार्टीबाट बन्नेबारे लेखिएर आएको उनले खुलासा गरे । “राष्ट्रपति को हुने भनेर पहिला नै तय छ । अहिलेको समीकरण जन्मदै त्यसको जन्मकुण्डलीमै लेखेर आएको छ उति बेलै,” उनले भने ।

नेकपा (माओवादी केन्द्र)का नेता जनार्दन शर्माले त सहमति भएको थाहा छैन भन्नुभएको छ नि भन्ने सञ्चारकर्मीको प्रश्नमा ओलीले भने,“सबैसँग त कहाँ सहमति हुन्छ र माओवादी कार्यकर्ता सबैसँग सहमति गर्दै हिँडेर हुन्छ त ?” अहिलेको समीकरण सोच विचार गरेर नै बनाएको भन्दै ओलीले एमालेले उठाउने राष्ट्रपतिको उम्मेदवारलाई माओवादी केन्द्रले समर्थन गर्ने विश्वास व्यक्त गरे ।

त्यस्तै, उनले एमालेले उठाउने उम्मेदवारको नाम आफूले १३ गते सार्वजनिक गर्ने पनि बताए ।