रूपन्देही, १५ माघ । नेकपा (एमाले)का उपमहासचिव तथा पूर्वमन्त्री प्रदीपकुमार ज्ञवालीले एमालेका उम्मेदवार नै राष्ट्रपति बन्ने बताएका छन् ।

सत्तारूढ नेकपा (माओवादी केन्द्र)ले राष्ट्रपतिमा राष्ट्रिय सहमति खोज्ने निर्णय गरेको भोलिपल्टै एमालेका प्रभावशाली नेता मानिने ज्ञवालीले यस्तो बताएका हुन् । “प्रचण्डले भनेको राष्ट्रिय सहमतिको राष्ट्रपतिको उम्मेदवार एमालेकै हो, यसमा कोही दुविधा हुनु पर्दैन,” प्रेस चौतारी पाल्पाले शनिबार आयोजना गरेको पत्रकार भेटघाटमा बोल्दै उनले भने, “राष्ट्रपति एमालेले नै पाउने हो, सत्ता गठबन्धन दलबीच भएको सहमतिअनुसार ने राष्ट्रपति एमालेले पाउने विषयमा कोही अन्योल हुनुपर्ने छैन ।”

बाहिर चर्चामा आएजस्तो आफूहरू सशंकित नरहेको उनले बताए । “केही दलले छिर्के दाउ हानेर वर्तमान सत्ता गठबन्धन तोड्ने प्रयास गरिरहेका छन् । त्यो सफल हुने छैन । सत्ता गठबन्धनका दलप्रति एमाले सशंकित छैन । राजनीति विश्वसले चल्ने हो । एक माघले जाडो जाने विषय पनि होइन । यो कसैलाई छिर्के हानेर दाउपेचमा राखेर राजनीति गर्ने विषय पनि होइन । इमानदारिता र निष्ठा राजनीतिका आधार हुन् यी टुटे भने केही बाँकी रहँदैनन् । विश्वासघात कसैबाट हुने छैन,” उनले भने ।

अहिलेको सत्ता गठबन्धनबीच भएको सहमति र सम्झौता कार्यान्वयनमा सबै दल इमानदार रहेको उनले बताए । आफूसँग भएको सत्तालाई सही रूपमा व्यवस्थापन गर्न नसक्दा कांग्रेसले सबै गुमाएको तर अझै पनि धमिलो पानीमा माछा मर्छ कि भनेर राष्ट्रपतिको दाउ ताकेको ज्ञवालीले बताए ।

“धमिलो खोलामा माछा मार्न खोजेजस्तो कांग्रेसले राष्ट्रपति लिने दाउमा छ, कांग्रेसले प्रधानमन्त्री प्रचण्डलाई विश्वासको मत दिनुको अर्थ राष्ट्रपति पाउने आशा हो । गठबन्धनमा खेल्न यस्तो गरिएको सबैले बुझेका छन्, प्रधानमन्त्रीज्यूले कांग्रेसलाई कुनै वचन दिएर मत माग्नु भएको छैन । पूर्व सहमतिअनुसार नै एमालेका उम्मेदवार राष्ट्रपति बन्छन्,” उनले भने ।