काठमाडौं ७ पुस । नेकपा माओवादीका अध्यक्ष पुष्पकमल दाहाल ‘प्रचण्ड’ र प्रधानमन्त्री तथा कांग्रेस सभापति शेरबहादुर देउवाबीच शक्ति बांडफांट र नयां सरकार गठनका बारे वान अन वान छलफल शुरु भएको छ ।
गठबन्धनको भविष्य र नयाँ सरकार गठनबारे नेपाली कांग्रेसका सभापति एवं प्रधानमन्त्री शेरबहादुर देउवासँग ‘निर्णायक वार्ता गर्ने भन्दै माओवादी अध्यक्ष प्रचण्ड आफ्नो संसदीय दलको बैठक लगत्तै बालुवाटार पुगेका छन् ।
आज साँझ देउवासँग निर्णायक वार्ता गर्ने प्रचण्डले दिउँसो बसेको माओवादी केन्द्रको पदाधिकारी बैठकमा जानकारी गराएका थिए । ‘सरकार गठनका लागि छलफल चलिरहेको छ, कुरा सकारात्मक नै छ । संसदीय दलको नेता चयनपछि आजै (बिहीवार साँझं) देउवाजीसँग कुरा गर्दैछु’, प्रचण्डको भनाइ उदृत गर्दै माओवादीका एक सचिव तथा प्रमुख सेचतक हितराज पाण्डेले बताए । ‘
प्रचण्ड बिहीवार बसेको संसदीय दलको बैठकबाट संसदीय दलको नेतामा सर्वसम्मत चयन भइसकेका छन् ।
राष्ट्रपति विद्यादेवी भण्डारीले सरकार गठनका लागि दाबी पेश गर्न पुस १० गतेसम्मको समयसीमा दिएपछि दलहरूबीच सरकार गठनका बारेमा छलफल हुन थालेको छ । सबै दलले संसदीय दलको नेता चयन गरिसकेपछि सरकार गठनको छलफलले अझै तीव्रता पाउने अपेक्षा गरिएको छ ।
माओवादी केन्द्रले अध्यक्ष प्रचण्ड पहिलो कार्यकालमै प्रधानमन्त्री बन्नु पर्ने बटम लाइन बनाएको छ । संसदको सबैभन्दा ठूलो दल कांग्रेसले पनि आफ्नै नेतृत्वमा सरकार गठनको प्रयास गरिरहेको छ ।
सत्ता गठबन्धनका अधिकांश नेताहरूले गठबन्धनकै सरकार बन्ने बताइरहेका छन् । यद्यपि, कसको नेतृत्वमा, कसरी सरकार गठन हुन्छ भन्ने बारेमा भने ठोस निर्णय भइसकेको छैन ।
एमालेले पनि सरकार गठनको कसरत गरिरहेको छ । सत्ता गठबन्धनबाट माओवादी बाहिर निकालेर प्रचण्डलाई नै प्रधानमन्त्री बनाएर राष्ट्रपति सहित ४ वटा प्रदेश सरकारको नेतृत्व गर्ने तयारीमा एमले अध्यक्ष ओलीले कोशिश गरिरहेका छन् ।
प्रचण्डलाई नेतृत्व हस्तान्तरण गर्न देउवालाई माओवादीको प्रस्ताव, देउवा अझै मौन !
प्रतिक्रिया दिनुहोस्