काठमाडौं, १७ पुस । धनकुटाका स्थानीय नेता तथा कार्यकर्ताहरुले प्रदेश नम्वर १ को राजधानी धनकुटालाई घोषणा माग गर्दै आज प्रधानमन्त्रीको सरकारी निवासमा धर्ना दिएका छन् । धर्नाकारीहरुले धनकुटालाई १ नम्वर प्रदेशको राजधानी नबनाए आन्दोलन गर्ने चेतावनीसमेत दिएका छन् ।

प्रादेसिक राजधानी निर्माण अभियान समितिले आज प्रधानमन्त्री निवास बालुवाटारमा बिहान साढे ८ बजेदेखि ११ बजेसम्म घेराउ र धर्ना दिएको थियो । १ नम्वर प्रदेशको राजधानी धनकुटालाई घोषणा गर्न माग गरेको नेपाली कांग्रेस धनकुटाका सचिव तथा नेपाल प्रेस युनियनका केन्द्रीय उपाध्यक्ष विजय सन्तोषी राईले बताउनुभयो ।

पूर्वाधार, सामथ्र्य, सुरक्षा, सुन्दरताको खानी रहेको धनकुटालाई १ नम्वर प्रदेशको राजधानी बनाउँदा अन्तर्राष्ट्रिय सिमाना र भौगोलिक समदुरीले पनि उपयुक्त रहेको भन्दै सचिव राईले विवादरहित पनि हुने भएकाले धनकुटालाई १ प्रदेशको राजधानी घोषणा गर्न माग गरिएको बताउनुभयो ।

धर्ना तथा घेराउ कार्यक्रममा प्रदेश सभाका सांसद इन्द्रमणी पराजुली, नेपाली कांग्रेसका धनकुटाका सभापति अग्नीप्रसाद पौडेल, नेकपा एमालेका नेता धर्मराज पौडेल, अभियानका संयोजक उमेश घिमिरे, नेपाल प्रेस युनियनका केन्द्रीय उपाध्यक्ष विजय सन्तोषी राई, मानव अधिकार एलाइन्सका केन्द्रीय उपाध्यक्ष विदुर सुवेदी, नागरिक समाजका अध्यक्ष दोर्ण गुरागाई लगायत सहभागी थिए ।

साथै, धर्नामा प्रदेश सभाका सांसदहरु लिला सुब्बा, आर सी तुम्वा, बिना राई, कुसुम कुमारी श्रेष्ठ, पूर्व सांसद मनोहर नारायण श्रेष्ठ, पत्रकार महासंघका केन्द्रीय सदस्य गोपाल वराईली, धनकुटाका अध्यक्ष राजेश्वरबहादुर श्रेष्ठ, धनकुटा काठमाडौ विभिन्न पार्टीका सम्पर्क समिति, मञ्च, गणातान्त्रिक मञ्च लगायतका पदाधिकारीहरु, धनकुटा लगायतका १ नम्वर प्रदेशका जिल्लाहरुबाट काठमाडौ आई पेशा व्यवसाय तथा रोजगार गरिरहेका धनकुटाबासीहरुको समेत उल्लेखनीय उपस्थिति रहेको थियो ।

प्रदेश नम्वर १ को धनकुटालगायत १४ वटै जिल्लाबाट र राजधानी काठमाडौमा धनकुटालाई १ नम्वर प्रदेशको राजधानी बनाउन माग गर्दै हस्ताक्षर गरिएको ७ लाखभन्दा बढीको हस्ताक्षर र ज्ञापनपत्र भोली प्रधानमन्त्री देउवालाई बुझाउने कार्यक्रमको रहेको समेत नेपाली कांग्रेस धनकुटका सचिव राईले बताउनुभयो ।