बुटवल, ७ मंसिर ।
पूर्वअर्थमन्त्री विष्णुप्रसाद पौडेलले बुटवललाई पाँच नम्बर प्रदेशको राजधानी बनाउने ऐजेन्डा सहितको चुनावी प्रतिबद्धतापत्र सार्वजनिक गरेका छन् । रुपन्देही निर्वाचन क्षेत्र नम्बर २ का प्रतिनिधिसभा सदस्य उम्मेद्वार पौडेलले बुटवललाई विकासको नमूना सहर बनाउने योजना सहितको प्रतिबद्धतापत्र सार्वजनिक गरेका हुन ।
विहिबार बुटवलमा आयोजित पत्रकार सम्मेलनमा पौडेलले पाँच नम्बर प्रदेशबाट पहाड र तराई अलग गराउने प्रयास सदाका लागि अन्त्य भएको भन्दै प्रादेशिक राजधानी बुटवलमै बनाउने गरि पूर्वाधार निर्माणलाई प्राथमिकता दिने बताए । पौडेलले बुटवलमा निर्माणधिन अन्तराष्ट्रिय सम्मेलन केन्द्र र प्रदर्शनी स्थल शिघ्र निर्माण गरि सञ्चालन गर्ने, बुटवल तिलोत्तमा र सैनामैना नगरपालिकामा बृहत कृषि हाटबजार निर्माण गर्ने, आधुनिक सञ्चारग्राम निर्माण गर्ने, कृषि र पर्यटनलाई बुटवलको विकाशसँग जोड्ने योजना रहेको बताए । जेष्ठ नागरिक तथा एकल महिलाको सामाजिक सुरक्षा भत्ता ५ हजार पुर्याउने समेत उनले बताए ।

एमाले उपमहासचिव समेत रहेका पौडेलले आफूले पहिल्यैदेखि अव्यस्थित र सुकुम्बासीहरुको समस्या समाधानका लागि काम गरेको भएपनि विचमा अवरोध भएकाले रोकिएको बताउँदै अब त्यसलाई स्थायी रुपमा समाधान गर्ने बताए । नेकपा एमाले र नेकपा माओवादी केन्द्रका तर्फबाट संयुक्त प्रतिबद्धतापत्र १६ पृष्ठको रहेको छ । निर्वाचन क्षेत्र नम्बर २ बाट वामगठबन्धनबाट प्रतिनिधिसभाका लागि पौडेल, २ को १ बाट लिला गिरी र २ को २ बाट भोजप्रसाद श्रेष्ठको उम्मेद्वारी रहेको छ ।
यसैगरि लोकतान्त्रिकबाट प्रतिनिधिसभा सदस्य युवराज गिरी, प्रदेशसभाका लागि १ बाट काजिमान श्रेष्ठ र २ बाट महेशमान सिंह चुनावी मैदानमा छन् । यहाँ १ लाख ५ हजार २ सय ६ मतदाता छन् ।