काठमाडौं, ३ पुस । अर्थमन्त्री डाक्टर युवराज खतिवडाले ठूला आयोजना कार्यान्वयनमा ठूलो समस्याको रुपमा रहेको नदीजन्य सामग्रीको अभाव पूरा गर्न अब पहाड नै फोर्नुपर्ने बताउनुभएको छ ।

प्रतिनिधिसभाको अर्थ समिति बैठकमा बोल्दै अर्थमन्त्री खतिवडाले वातावरणलाई असर नपर्ने गरी पहाडको उत्खनन गरेर निर्माण सामाग्रीको आपूर्ति गर्नुपर्ने बताउनुभएको हो । खतिवडाले प्रदेश र स्थानीय तहबीचको बहसका कारण पहाडबाट निर्माण सामग्रीहरु उत्खनन गर्न कठिनाई भएको उल्लेख गर्दै यस्तो अवस्था रहिरहे ठुला परियोजनाहरुको निर्माण कार्य प्रभावित हुने जिकिर गर्नुभयो । ठूला विमानस्थल, रणनीतिक राजमार्ग, रेल्वे परियोजनाका धेरै काम अगाडि बढ्ने क्रममा रहेको भन्दै उहांले पहाड फोर्ने कुरामा संसदको सहयोग चाहिने जिकिर गर्नुभयो ।

अर्थमन्त्री खतिवडाले एउटा सडक निर्माण गर्न सात आठवटा निकायले काम गरिरहेको बताउँदै सबै निकाय सडक निर्माणमा केन्द्रीत हुन नहुने बताउनुभयो । उहाँले ७ सय ६१ वटै सरकार र तीनका सबै मन्त्रालय तथा निकायहरु कुनै न कुनै रुपमा सडक निर्माणमा मात्र केन्द्रीत रहेको बताउँदै अहिले जथाभावी सडक निर्माणले अस्तव्यस्त बनाएको जिकिर गर्नुभयो । अर्थमन्त्री खतिवडाले पछिल्लो समय सार्वजनिक खरिद नियमावलीका कारण पनि विकास निर्माण प्रभावित भएको बताउनुभयो । त्यस्तै आयोजनाको प्राथमिकता निर्धारण गर्न नसकिएकोले बजेट खर्च कम भएको उल्लेख गर्दै उहांले तीन वटै तहका सरकारबीच समन्वयको आवश्यकता रहेको धारणा राख्नुभयो ।

उहाँले स्थानीय तह र प्रदेश सरकारको बजेट खर्च न्यून भएका कारण पनि विकास खर्च कम देखिएको बताउनुभयो । उहांले सरकार अर्थतन्त्रको संरचनामै परिवर्तन गर्ने क्रममा रहेका कारण त्यसको साइड इफेक्ट देखिएको बताउनुभयो । निर्यात वृद्धि गर्दै आयातमुखी अर्थतन्त्रबाट नेपाल आत्मनिर्भरतातर्फ अगाडि बढ्ने क्रममा रहेका कारण अहिले केही समस्या देखिएको खतिवडाको भनाइ छ । अव दिगो आर्थिक विकासको आधार तयार हुन लागेको समेत उहांले बताउनुभयो ।