पोखरा, २१ जेठ । प्रदेश नं ४ का मुख्यमन्त्री पृथ्वीसुब्बा गुरुङले प्रदेश सरकारको आगामी बजेट लोकप्रियताका लागि नभई उत्पादनमुखी हुने बताउनुभएको छ ।

प्रदेश नं ४ भौतिक पूर्वाधार विकास मन्त्रालयद्वारा आज पोखरामा आयोजित नविकरणीय ऊर्जासम्बन्धी अन्तक्र्रिया कार्यक्रमको उद्घाटन गर्दै उहाँले प्रदेश सरकारले उत्पादन र उत्पादकत्व वृद्धिका साथै दिगो विकासमा आधारित योजनालाई लक्ष्य गरी बजेट ल्याउन लागेको बताउनुभयो ।

पर्यटन, ऊर्जा, कृषिको आधुनिकीकरणजस्ता कार्यक्रमलाई प्राथमिकताका आधारमा प्रदेश सरकारले अघि बढाउने उहाँले बताउनुभयो । ऊर्जाको विकासलाई सरकारले महत्वका साथ अघि बढाउने धारणा राख्दै उहाँले यहाँका उद्योगलाई २४ घण्टा विद्युत् उपलब्ध गराउने लक्ष्य रहेको बताउनुभयो ।

प्रदेश सरकारले यहाँको आवश्यकताअनुरुप विकास निर्माणका साथै ऊर्जा विकासमा लगानीको प्रत्याभूति गर्नेमा उहाँले जोड दिनुभयो ।

कार्यक्रममा उँहाले संघीय सरकारमा संघीय मानसिकता नै नदेखिएको आरोप पनि लगाउनुभयो ।

संघीय सरकारलाई शुरु देखिनै स्रोत, साधन र बजेटको बाँडफाँट गर्नका लागि आग्रह गर्दा बजेटमा सबै कुरा आउँछ भनेको तर बजेटमा त्यसको सम्बोधन नभएको मुख्यमन्त्री गुरुङले बताउनुभयो ।

‘संघीय सरकारमा संघीय मानसिकता नै देखिएन, संघीयता भनेको स्रोतको बाँडफाँट पनि त होला नि, साधन र अधिकारको बाँडफाँट पनि त होला नि, अनि बजेटको पनि बाँडफाँट होला नि ! तर त्यस्तो भएको छैन’ उँहाले भन्नुभयो । गुरुङले प्रदेश सरकारले के के गर्न मिल्छ त्यो प्रष्ट भनिदिनुपर्ने बताउनुभयो ।