डोल्पा, १४ जेठ । यार्सागुम्बा टिप्न ठुलीभेरी नगरपालिका १० को ग्यालवारा पाटन पुगेका थप २ जना लेक लागेर विरामी परेका छन् । आफन्त र प्रहरीद्धारा उनीहरुको उद्धार गरी जिल्ला अस्पताल डोल्पामा लगिएको छ ।

यार्सागुम्बा टिप्न ठुलीभेरी नगरपालिका १० मा पर्ने ग्यालवारा पाटन पुगेका २ जना यार्सा संकलकहरु गणेशकुमारी रोकाया र निदेश शाही लेक लागेर विरामी परेपछि उपचारका लागि जिल्ला अस्पताल डोल्पामा भर्ना गरिएको हो ।

विरामी पर्नेमा ठुलीभेरी नगरपालिका ६ की १६ वर्षकी गणेशकुमारी रोकाया र मुड्केचुला गाँउपालिकाका १८ वर्षिय दिनेश शाही रहेको र उनीहरुको उपचार भैरहेको जिल्ला अस्पताल डोल्पाका डा. लक्ष्मण नेपालले बताए ।

उनीहरुलाई स्थानीय र प्रहरीहरुले उद्धार गरेर जिल्ला अस्पताल डोल्पामा उपचारका लागि भर्ना गरेको डा. नेपालले जानकारी दिए । उपचारमा रहेका मध्ये गणेशकुमारी रोकायाको अवस्था गम्भिर रहेको छ ।

वेहोस अवस्थामा रहेकी रोकायाको उपचार डोल्पामा नहुने भएकाले थप उपचारका लागि नेपालगञ्ज वा काठमाण्डौं लानुपर्ने अवस्था रहेको छ । विरामी रोकायालाई उनका आफन्तले कुरिरहेका छन् । उनका बाबु सोमवार बेलुकीसम्म आएका छैनन् ।
उनका बाबु नआएकाले जिल्ला अस्पताल डोल्पाले सिफारिस गरी नेपालगञ्ज काठमाण्डौं पठाउन नसकेको जनाएको छ ।

अस्पतालका अनुसार लेक लागेका विरामीको उपचार सरकारी सहयोगमा नपर्नेे भएकाले विरामीले आफ्नै खर्चमा उपचार गर्नुपर्ने हुन्छ ।

विश्वको उच्च मानव बस्ति धो मा यार्सागुम्बा टिप्न गएर विरामी परेका रुकुमका हरिबहादुर शाहीको आइतवार पूर्व गृहमन्त्री जनार्दन शर्माको पहलमा नेपाली सेनाको हेलिकोप्टर मार्फत उपचारका लागि नेपालगञ्ज लगिएको थियो ।

आर्थिक अवस्था नाजुक भएकाले लेक लागेर बेहोस अवस्थामा रहेकी रोकायाको उपचारकाको ब्यबस्था मिलाई दिनको लागि आफन्तले सरकारसँग आग्रह गरेका छन् ।