काठमाडौँ, ८ चैत । कानून न्याय तथा संसदीय मामिलामन्त्री शेरबहादुर तामाङले प्रदेश सरकार सञ्चालनका लागि छिट्टै नै नमूना कानून बनाएर पठाउने बताउनुभएको छ ।

रिपोर्टर्स क्लबद्वारा यहाँ आज आयोजित कार्यक्रममा उहाँले भन्नुभयो– “ अबको १० देखि १५ दिनभित्रमा सबै प्रदेश कार्यालयमा नमूना कानून पु¥याउने छ ।”

मन्त्री तामाङले अबको १५ दिनभित्रमा कानून पुगेपछि प्रदेश सरकारले कानूनको अभावले काम रोकिएको भन्न नपाउने बताउँदै आउँदो असोज ३ गतेभित्र सबै कानून बनाइसक्ने जानकारी दिनुभयो ।

उहाँले नयाँ संविधानअनुसार मन्त्रालयले ३८६ वटा कानून बनाउनुपर्ने बताउँदै अब बन्ने नयाँ कानून पीडितले न्याय पाउने गरी बन्ने धारणा व्यक्त गर्नुभयो ।

“पीडितले न्यायलयबाट न्याय नपाएको र पीडकले उन्मुक्ति पाउने गरेको सुन्ने गरेको छु”, उहाँले भन्नुभयो, “पीडितले न्याय पाउने गरी खुशीका साथ न्यायलय जाने वातावरण अब हुनेछ ।”

मन्त्री तामाङले न्यायलयमा देखिएको विकृतिसमेत अन्त्य गरी यसलाई स्वच्छ र स्वतन्त्र बनाइने उल्लेख गर्दै सुशासन र जनतालाई सहज न्याय पाउने वातावरण बनाउने बताउनुभयो ।

विधिको शासनलाई कडाइका साथ लागू गरिने छ, उहाँले भन्नुभयो, “कानूनको अभावले होइन, कार्यान्वयनको अभावले बेथिति जन्मिएको हो, अब कोही पनि कानूनभन्दा माथि हुने छैनन् ।”

मन्त्री तामाङले सार्वजनिक पद धारण गरेको व्यक्तिले सम्पत्ति विवरण बुझाउने मात्र नभई सार्वजनिक गर्ने कानून निर्माण गर्न थालेको पनि जानकारी गराउनुभयो ।