ललितपुर, २७ पुस । ललितपुरको नख्खु कारागार विस्तार भएर एक हजारजना अट्ने क्षमताको हुने भएको छ ।

पहिले झण्डै ५०० क्षमताको कारागारमा अहिले ५०० क्षमता थप हुन लागेको कागारागर प्रमुख टेकबहादुर केसीले बताउनुभयो । पुरुष कैदी÷बन्दी राख्ने २५० क्षमताको एउटा ब्लक र अर्को त्यति नै क्षमताको महिला ब्लक बनाइएको छ । पुरुषलाई राख्न बनाइएको ब्लकमा कैदी÷बन्दी बस्न थालिसकेका छन् । महिला राख्ने ब्लक भने छिट्टै निर्माण सकिएर सञ्चालनमा आउने उहाँले जानकारी गराउनुभयो ।

“ठेकेदारले ढिलाइ गरेकाले केही समय लम्बियो, अब असारसम्ममा यहाँ महिला कैदी सारिने छ,” कागारागर प्रमुख केसीले भन्नुभयो ।

पहिले यहाँ सामुदायिक पुनःस्थापना केन्द्र (सिआरसी) र लागू औषध पुनःस्थापना केन्द्र (डिआरसी) गरेर दुईवटा ब्लक भूकम्पका समयमा क्षतिग्रस्त भएकाले पुनः निर्माण भइरहेको हो । लामो समयसम्म पालमा बसेका दुईवटा ब्लकका कैदी÷बन्दी अस्थायी टहरामा बसिरहेका छन् । अस्थायी भनिने टहरा पनि पछिसम्म काममा आउने उल्लेख गर्दै कारागार प्रमुख केसीले भन्नुभयोे, “अस्थायी टहरा पनि कैदी÷बन्दी राख्न वा कार्यालयका अरू कामका लागि प्रयोग गर्न मिल्ने खालका छन् ।” कारागारमा कैदी÷बन्दीका लागि मनोसामाजिक उपचार केन्द समेत निर्माण भइरहेको छ ।