बुटवल, २९ फागुन।
‘कोरोना भाइरस’बाट हुने सम्भावित जोखिमलाई मध्यनजर गर्दै प्रदेशमा पूर्व सावधानी अपनाउन मुख्यमन्त्री शंकर पोखरेलले सम्बन्धीत मन्त्रालयलाई निर्देशन दिनुभएको छ । मुख्यमन्त्री तथा मन्त्रिपरिषद्को कार्यालयमा आज आयोजित पूर्वतयारी बैठकमा उहाँले प्रदेशमा समेत सबै अस्पताललाई सतर्क अवस्थामा रहन र ‘आइसोलेसन वार्ड’बनाएर उपचारको व्यवस्था मिलाउन निर्देशन दिनुभयो । मुख्यमन्त्री पोखरेलले प्रदेशका सिमानाकाबाट बाहिरीने र भित्रीने अन्य मुलुकका सवारीलाई प्रवेशमा रोक लगाउनका लागि छलफल गर्न मातहतका कार्यालयलाई निर्देशन दिनुभयो ।
कोरोना भाइरसको संक्रमण फैलिन नदिन प्रदेश नं ५ सरकारले पूर्वतयारी सुरु गरेको छ । प्रदेशमा अहिलेसम्म रोग देखा नपरे पनि उच्च जोखिममा रहेको हुदा यसको नियन्त्रणका लागि पूर्वतयारी थालिएको प्रदेश सरकारले जनाएको छ ।
सरकारले प्रदेशका सिमानाकाबाट भित्रीने र बाहिर जाने अन्य मुलुकमा सवारी साधनलाई प्रवेशमा रोक लगाउने तयारी गरिएको छ । प्रदेश सरकारले सिमानाकामा राखिएका ‘हेल्थ डेस्क’लाई थप प्रभावकारी बनाइ विदेशबाट आउने यात्रुलाई उच्च निगरानीमा राखी स्वास्थ्य परीक्षण गरी पठाउने व्यवस्था समेत मिलाइएको सामाजिक विकास मन्त्रालयले जनाएको छ । प्रदेशका ४ जिल्ला अस्पतालमा ‘आइसोलेसन वार्ड’बनाएर उपचारको व्यवस्था मिलाइएको छ ।
“आवश्यक परेको समयमा खाली हुने गरि अस्पतालमा बेडको व्यवस्था गरिएको छ । फोकल पर्सन तोकिएको छ । प्रदेश सरकारका सामाजिक बिकास मन्त्री सुदर्शन बरालले भन्नुभयो, “संक्रमण फैलिएमा आवश्यक विशेष सामाग्री तयारी अवस्थामा राखेका छौ । ”
फागुन २६ गते विपद् व्यवस्थापन समितिको बैठक बसेर कोरोना भाइरसको सम्भावित संक्रमण, फैलावट कम गर्न र निम्तने सक्ने विपद् व्यवस्थापनका लागि प्रदेशका विभिन्न स्थानमा क्वारेन्टाईनको उपयुक्त स्थान पहिचान गरी सुरक्षा निकायको समन्वयमा सामाजिक विकास मन्त्रालयले आवश्यक तयारी गर्ने निर्णय भएपछी सोही अनुसार काम अगाडी बढाइएको मन्त्री बरालले बताउनुभयो ।
रुपन्देहीका सिमा क्षेत्रमा पनि निगरानी बढाइएको छ । रुपन्देहीमा सिमानाकामा दुई हजार ५९१ जनालाई स्क्रिनिङ टेस्ट गरिएको प्रमुख जिल्ला अधिकारी महादेव पन्थले जानकारी दिनुभयो ।
प्रदेशका स्थानीय तहले पनि नागरिकमा सचेतना कार्यक्रम सञ्चालन गरेका छन् । विद्यालयमा सचेतना कार्यक्रम सञ्चालन, समुदायमा माइकिङ र पर्चा वितरण गरेर कोरोना भाइरसको संक्रमणबारे जानकारी गराएको तिलोत्तमा नगपालिकाका प्रमुख वासुदेव घिमीरेले बताउनुभयो ।
“जहाँ भीडभाड हुन्छ, यस्तो ठाउँमा तुरुन्तै बन्देज लगाउनुपर्यो,’ मुख्यमन्त्री पोखरेलले भन्नुभयो, ‘परिवार भन्दा बाहिर जमघट नगरौ ।” कोरोना भाइरसको संक्रमण फैलिन नदिन भिडभाडबाट जोगिन आवश्यक रहेको उहाँको भनाइ छ । ज्वरो आउने, रुघाखोकी लाग्ने,घाटी दुख्ने जस्ता लक्षण देखा परे स्वास्थ्य संस्थामा जचाँउन आग्रह गर्दै उहाँले भन्नुभयो, “अहिलेसम्म कुनै असर देखिएको छैन, देखिइ हालेमा पूर्व तयारी गरेका छौ । ”
प्रदेश सरकारले प्रदेश ५ का १० वटा अस्पतालमा यसको तयारीका लागि आइसोलेशन बेड तयार पारेको छ ।लुम्बिनी प्रादेशिक अस्पताल बुटवलमा २ वटा क्याबिन आइसोलेशन बेडका रूपमा छुट्याइएको अस्पतालका मेडिकल सुपरिटेण्डेन्ट डा. राजेन्द्र खनालले बताउनुभयो ।
यसैगरी सामाजिक बिकास मन्त्रालय प्रदेश स्वास्थ्य निर्देशनालयले भेरी अस्पताल नेपालगञ्जमा डा प्रकाश थापा, पृथ्वी चन्द्र अस्पताल, परासीमा डा पवन अग्रहरी, तौलिहवा अस्पताल डा गणेश क्षेत्री , राप्ती स्वास्थ्य विज्ञान प्रतिष्ठान डा सदिक्षा योगी, देवदह मेडिकल कलेज डा सुन्दर पाण्डे, लुम्बिनी मेडिकल कलेज पाल्पामा डा दीपक भण्डारी, युसिएमएस भैरहवामा डा नविनजंग रायमाझी, नेपालगञ्ज मेडिकल कलेजमा डा सुन्दरजंग शाह र मिसन अस्पताल पाल्पामा डा गजेन्द्र नेपालीलाई तोकिएको छ ।