बुटवल, २५ फागुन । प्रदेश ५ सरकारका मुख्यमन्त्री शंकर पोखरेलले नारी दिवसलाई महिला सशक्तिकरण र आत्मसम्मान उत्सवको रुपमा मनाउने गरिएको बताउनु भएको छ । अन्तराष्ट्रिय श्रमिक महलिा दिवसका अवसरमा शुभकामना सन्देश संप्रेयाण गर्दै मुख्यमन्त्री पोखरेलले विश्वमा मार्च ८ लाई महिला सशक्तिकरण र आत्मसम्मान उत्सवका रुपमा मनाईने गरेपनि नेपालमा राजनैतिक चेतना र जागरण विस्तारको अवसरका रुपमा मनाइदैं आएको बताउनु भएको छ ।
जहाँनिया राणा शासन, निरकुंश पञ्चायती व्यवस्था र शाही शासनको कठीन अवस्थामा प्रजातान्त्रिक अधिकार प्राप्तिका लागि नेपाली महिलाहरुले गरेको संघर्ष निकै अविस्मरणीय रहेको स्मरण गर्दै उहांले अध्याँरो र अप्ठ्यारो दिनमा मार्च ८ को विशेष महत्व रहेको समेत उल्लोख गर्नुभएको छ ।
उहांले शुभकामना सन्देशमा विगतमा भएका आन्दोलन र संघर्षबाट नै संविधानमा महिला अधिकारका विषयलाई समेट्न संभव भएको बताउंदै राज्यको माथिल्लो तहदेखि तल्लो तहसम्मका सबै संरचनामा महिलाको समानुपातिक प्रतिनिधित्व हुने संवैधानिक व्यवस्था रहेको स्पष्ट पार्नुभएको छ।
अहिले पनि नेपाली महिला बोक्सी, छाउपडी र दाइजो जस्ता कुरीतिको शिकार भइरहेको प्रति चिन्ता ब्यक्त गर्दै सन्देशमा यस्ता कुरीतिलाई हटाउन सबै हातेमालो गरेर अघि बढ्न जरुरी रहेको बताउनु भएको छ ।
सन्देशमा सरकारले कोरोना भाइरसको संक्रमणको संभावित जोखिमलाई ध्यान दिदैं भेला,सभा र सम्मेलन नगर्न आग्रह गरेको उल्लेख गर्दै अन्तराष्ट्रिय महिला दिवस पारिवारिक रुपमा मनाउन आह्वान समेत गर्नुभएको छ । अन्तराष्ट्रिय महिला दिवसलाई कोरोना भाइरस विरुद्धको सर्तकता र सचेतना दिवसको रुपमा मनाउन मुख्यमन्त्रीले अपील समेत गर्नुभएको छ ।