काठमाण्डौं, २० काक्तिक । पार्टीले टिकट नदिएपछि असन्तुष्टि जनाउँदै पार्टीको उम्मेदवार विरुद्ध बागी उम्मेदवारी दिएकाहरुले उम्मेदवारी फिर्ता लिएका छन् । उम्मेदवारी फिर्ता लिनेमा विषेश गरी वाम गठबन्धनका उम्मेदवारविरुद्ध उम्मेदवारी दिनेहरु रहेका छन् । यसरी उम्मेदवारी फिर्ता लिनेमा कोमल वलीदेखि जगन्नाथ खतिवडासम्म रहेका छन् ।

मंसिर २१ गते दोस्रो चरणमा हुने प्रदेश र प्रतिनिधिसभा निर्वाचनका लागि विभिन्न राजनितिक पार्टीका उम्मेदवारविरुद्ध त्यही पार्टीका असन्तुष्ट नेताहरुले बागी उम्मेदवारी दिएका थिए । पार्टीको निर्णयमाथि असन्तष्टी जनाउँदै दिइएको ती बागी उम्मेदवारीहरुमध्ये प्रायः फिर्ता गरिएको छ । बा“केमा प्रतिनिधीसभा र प्रदेशसभा निर्वाचनमा उम्मेदवारी दिएकामध्ये ९ जनाले आफ्नो उम्मेदवारी फिर्ता लिएका छन् । बाँकेको निर्वाचन क्षेत्र नम्बर १ मा प्रतिनिधीसभामा स्वतन्त्र उम्मेदवारी दिएका नेपाली काँग्रेसका नेता कृष्णबहादुर कार्की तथा नेकपा माओवादी केन्द्रका नेता सबिर खाँ र सुरेशकुमार चौधरीले आइतबार उम्मेदवारी फिर्ता लिएका हुन् ।

प्रतिनिधिसभा सदस्यका लागि उदयपुर–२ मा उम्मेदवारी दिएका एमालेका नेता जगन्नाथ खतिवडाले उम्मेदवारी फिर्ता लिएका छन् । अब त्यहाँ वाम गठबन्धनको तर्फबाट माओवादीका हिमाल किराती मात्र उम्मेदवार भएका छन् । उदयपुर–२ मा एमालेबाट पोलिटब्यूरो सदस्य खतिवडा र माओवादीबाट किरातीले उम्मेदवारी दिएका थिए । दुबैलाई पार्टीले नै टिकट दिएका थिए । दाङ–३ मा आफ्नो स्वतन्त्र उम्मेदवारी दिएकी कोमल वलीले पनि आफ्नो उम्मेद्वारी फिर्ता लिएकी छिन् । राप्रपा छाडेर हालै एमालेमा प्रवेश गरेकी ओलीले एमालेले पूर्व सहमतिअनुसार समानुपातिक सूचीमा नराखेको भन्दै दाङ ३ मा वाम गठवन्धनबाट एमालेका हिराचन्द्र केसीविरुद्ध उम्मेदवारी दिएकी थिइन् ।

सिन्धुली १ मा उम्मेद्वारी दिएका एमालेका रामकुमार कार्कीले पनि उम्मेदवारी फिर्ता लिएका छन् । उनी सिन्धुली १ ख बाट सर्वसम्मतमा परेका थिए तर, पार्टीले प्रदीप कटुवाललाई सोही क्षेत्रमा उठाए पछि उनले प्रतिनिधिसभामा उम्मेदवारी दिएका थिए । सिन्धुली ३ प्रतिनिधिसभामा माओवादी केन्द्रका हरिबोल गजुरेल माथी परेको माओवादी केन्द्रकै बागी उम्मेदवार नारायण पौडेलले पनि आफ्नो उम्मेद्वारी फिर्ता लिएका छन् । नेपाली कांग्र्ेसमा पनि कैलाली ५ मा प्रधामन्त्री शेरबहादुर देउवाका पत्नी आरजु राणा देउवाविरुद्धका बागी उम्मेद्वार क्षितिज भण्डारीले आफ्नो उम्मेद्वारी फिर्ता लिएका छन् । धेरै बागी उम्मेद्वारहरुले आफ्नो उम्मेद्वारी फिर्ता लिए पनि केही नेताविरुद्ध परेको बागी उम्मेद्वारी फिर्ता भएन । सप्तरीमा संघीय समाजवादी फोरम नेपालका अध्यक्ष उपेन्द्र यादवले प्रतिनिधिसभा क्षेत्र नं. २ बाट दिएको उम्मेदवारी बिरुद्धमा राष्ट्रिय जनता पार्टी नेपालका सहमहामन्त्री जयप्रकाश ठाकुरले स्वतन्त्र रुपमा दिएको उम्मेदवारी फिर्ता भएन । त्यसै गरी दैलेखका कांग्रेसका प्रभावशाली नेता तथा पूर्व राज्यमन्त्री गणेशबहादुर खड्काद्वारा लोकतान्त्रिक गठबन्धनका उम्मेदवार दिपक शाही विरद्ध भएको बागी उम्मेद्वारी पनि फिर्ता भएन ।

राजनितिक पार्टीहरुले गरेको टिकट वितरणमा असन्तुष्ट जनाउँदै आ–आफ्नो योग्यता र पहुँच अनुसार विभिन्न राजनितिक पार्टीका नेता तथा कार्यकर्ताहरुले एकका विरुद्ध अर्कोले बागी उम्मेदवारी दिएका हुन् । देशमा हुने गरेको विभिन्न ऐतिहासिक निर्वाचनहरुमा गरिने विभिन्न तालमेल र बागी उम्मेदवारहरुको समस्यालाई समाधान गरेर निर्वाचन सफल बनाउनु पनि राजनितिक पार्टीहरुलाई चुनौती नै हुने गरेको छ । यद्धपि दोस्रो चरणमा हुने निर्वाचनका लागि बनेका राजनीतिक दलका आधिकारिक उम्मेदवाविरुद्धका धेरै बागी उम्मेद्वारहरुले आफ्नो उम्मेद्वारी फिर्ता लिइसकेका छन् । अबको लक्ष्य भनेको निर्वाचनलाई सफल बनाएर देशलाई स्थिर राजनीति र आर्थिक विकासतिर उन्मुख गर्नु नै सबै दलको उद्देश्य बन्नुपर्छ ।