नेपालगन्ज, १५ जेठ ।
करोडौ रकम अपचलन भएर कारोबार बन्द गरेको नेपालगन्जको सहकारी वित्तीय विकास संस्था लिमिटेडको सञ्चालक समितिले एक वर्षभित्र सबै बचतकर्ताको रकम फिर्ता गर्ने निर्णय सहित मंगलबार देखि संस्थामा लागेको ताला खोलेर एक लाख रुपैयाँभन्दा थोरै बचतकर्ताको रकम फिर्ता सुरु गर्ने निर्णय गरेको छ ।
वित्तीय संस्थाका ४ कर्मचारीले झन्डै २६ करोड रुपैयाँ अपचलन गरेको भेटिएपछि सञ्चालकहरुले आइतबारदेखि १५ दिनका लागि संस्था बन्द गर्ने दिर्ण गरेको थियो। संस्थाका बचतकर्ताले लगातार दबाब सिर्जना गरेपछि सञ्चालकहरु संस्थाको काउण्टर खोल्न बाध्य भएका हुन् । कुल पूँजी ५२ करोड रुपैयाँ रहेको संस्थाको झन्डै ११ करोड रुपैयाँ ऋण लगानी छ। अधिकांस ऋण लगानी संचालक समितीको निर्णयबाट हुने गरेकाले खराब प्रकृतिका ऋणको जिम्मेवारी संचालक समितीले लिनुपर्ने बचतकर्ता शेयरधनीहरुले बताएकाछन् । प्रमुख प्रबन्धक गोपाल भण्डारीका अनुसार करोडौ पुंजि भएको संस्थाको खातामा ३०–४० लाख रुपैयाँ मात्र रहेको छ। ‘४ हजार बचतकर्तामध्ये प्रारम्भिक रूपमा ३ सयभन्दा बढीको बचत रकम संस्थाको ढुकुटीमा दाखिला नगरेरै अनियमितता भएको छ। यस्तो रकम झन्डै १५ करोड रहेको भण्डारी बताउंछन् । उनका अनुसार कृत्रिम ऋणी तयार गरेर रकम हिनामिना गरेको र ऋणीबाट ऋण असुल भइसक्दा पनि कर्जा नै देखाएर १०–११ करोड रुपैयाँ अपचलन भएको छ।
फरार भनिएका संस्थाका खजुरा शाखा प्रबन्धक सूर्यबहादुर बिकले ऋण असुल भइसक्दा पनि ऋण कायमै राखेर पैसा आपूmले चलाएको बताएका छन्। संस्थाका ऋण प्रबाह गर्दा संचालक समितीको निर्णय वा अध्यक्ष हरदेवबक्स चौधरीको प्रत्यक्ष निगरानीमा प्रबाह हुने गरेकाले नक्कली ऋणी तयारी गर्नेमा चौधरीको समेत संलग्नता रहेको अनुमान गरिएको छ । ंजिल्ला प्रहरी कार्यालयमा उपस्थित भएका प्रबन्धक बिकले चाँडै रकम फिर्ता गर्ने बताएका थिए। संस्थाका अनुसार उनले ६२ लाख ८७ हजार ५३ रुपैयाँ अपचलन गरेका छन्।
अर्का अभियुक्त नेपालगन्ज शाखाका सहायक प्रबन्धक गंगाधर सुवेदीले २ करोड ८९ लाख ४७ हजार ९ सय १५ रुपैयाँ अपचलन गरेका छन्।
सबैभन्दा धेरै रकम अपचलन गर्ने नेपालगन्ज उपमहानगरपालिका–१७ परसपुरका अरुणकुमार पाठक फरार छन्। उनी संस्थाको मुख्य शाखा बैकिङ कार्यालय नेपालगन्जका बैकिङ प्रबन्धक हुन्। उनी एक्लैले २१ करोड ९४ लाख ३६ हजार १ सय २४ रुपैयाँ अपचलन गरेका छन्। ३८ लाख ७७ हजार ७ सय ७८ रुपैयाँ अपचलन गरेर राप्ती सोनारी–४ बैजापुर घर भइ संस्थाको बैजापुर शाखाका प्रबन्धक लीलाधर वली पनि फरार छन्।
संस्थाले १० जेठमा चारै जनालाई तीन दिनभित्र रकम दाखिला गर्न निर्देशन दिँदै सो अवधिमा रकम जम्मा नगरे कानुनी कारवाही गर्ने पत्र पठाएको छ। पत्रको बोधार्थ जिप्रका बाँकेलाई दिइएको छ।
प्रहरी र संस्थाका सञ्चालकबीच छलफल चलिरहँदा बचतकर्ता बिहान ७ बजेदेखि नै जिप्रकाको गेटमा पुगेका थिए। प्रहरीले उनीहरूलाई भित्र प्रवेश गर्न दिएको थिएन। गेटबाहिर उनीहरू आक्रोशित थिए। समूहमा धेरैजसो महिलाहरू सहभागी भएका थिए।
संस्थामा यस अघि पनि अनियमीतता र अपचलनको चर्चा चल्दै आएको छ । ५ वर्ष पहिले गैरकानुनीरुपमा संस्थाको नामबाट पेय पदार्थको ब्यवसाय गर्दै चौधरी सहित तत्कालिन संचालकहरुले लाखौं रकम हिनामिना गरेका थिए । सस्थालाई नाफामा नलगि खाजा खर्चका नाममा साधारणसभामा बांडिने मोटो रकमलाई नेपाल राष्ट्रबैंकले बेरुजु भन्दै आएको छ । पटक पटक सहकारी बिभाग र नेपाल राष्ट्रबैंकले कैफियत देखाई सच्याउन निर्देशन दिंदा समेत अध्यक्ष चौधरी सहितका संचालक समितीले अटेर गर्ने गरेकाले कर्मचारीहरुको मनोबल बढेको लगानीकर्ताहरुको आरोप छ ।