नेपालगन्ज, १७ बैशाख ।
देशभर जारी कक्षा १२ को परिक्षामा बाँकेको नेपालगन्जमा भने परिक्षा हल भित्र बोराका बोरा चिट फेला परेका छन् । मंगलबार नेपालगन्ज नगरका विभिन्न परिक्षा केन्द्रको अनुगमनको क्रममा परिक्षा हलमा ठूलो मात्रामा चिट भेटिएको हो ।
नेपालगन्ज उप–महानगरपालिकाले गरेको अनुगमनको क्रममा परिक्षा हलबाट बोराका बोरा चिट बरामद गरेको थियो । राष्ट्रिय परीक्षा बोर्ड कोहलपुरले कक्षा १२ को परिक्षा परीक्षा मर्यादित र शान्तिपुर्ण रुपमा संचालन गर्ने बताएपनी नेपालगन्जका परिक्षा केन्द्रमा भने संस्थागत रुपमा नै चिट चोराइएको पाइएको छ ।
नगर प्रमुख डा. धवल शम्शेर राणा नेतृत्वको टोलीले सात वटा परिक्षा केन्द्रबाट तीन बोरा चिट बरामद गरेको थियो । उपप्रमुख उमा थापामगर, प्रवक्ता प्रमोद रिजाल, नगर शिक्षा ईकाई समिती प्रमुख गोरख थापा र वडा अध्यक्षसहितको टोलीले बरामद गरेको चिट मंगलबार पत्रकार माझ सार्वजनिक गरेको थियो । मंगलबार कक्षा १२ को विज्ञान९फीजीक्स०को परिक्षा भएको थियो ।
नगर प्रमुख डा. राणाले संस्थागत रुपमै चिट चोराउने कार्य भएको दावी गरे । ‘अनुगमनको क्रममा संस्थागत रुपमा नै परिक्षा हलमा चिट चोराउने गरेको पाइएको छ’ उनले भने, ‘पहिलो पटकलाई कारवाही नगरिएपनी बुधबारबाट चिट चोराइएको पाइएमा कारवाही गरिने छ ।’
पहिलो पटकलाई चिट वरामद मात्र गरिएपनि अभिभावकमार्फत विद्यार्थीलाई सचेत रहन उनले आग्रह गरे । ‘शैक्षिक गुणस्तर सुधारका लागि अनुगमन गरेका हौं’ नगर प्रमुख डा. राणाले भने / अनुगमनका क्रममा केही केन्द्राध्यक्षले अनुगमन टोलीसँग बाझाबाझ गरेको समेत उनले बताए ।
उप–महानगरपालिकाका प्रवक्ता प्रमोद रिजालले निजी विद्यालयका विद्यार्थीले परिक्षा दिइरहेको केन्द्रमा अझैं वेजोग देखिएको भन्दै चिट चोर्ने र चोराउने काम संस्थागत रुपमै भएको बताए । निजि विद्यालयका विद्यार्थीहरुले परिक्षा दिइरहेको केन्द्रमा अझै बेजोग स्थिती रिजालले बताए ।
स्रोतका अनुसार परिक्षा केन्द्रका केन्द्राध्यक्ष लगायतको मिलोमतोमा सरकारी विद्यालयका भन्दा निजी विद्यालयका विद्यार्थीहरुले परिक्षा दिने केन्द्रहरुमा अमर्यादित रुपमा परिक्षा सञ्चालन भइरहेको छ ।
उता शिक्षकहरुको एउटा संगठनले नगर प्रमुखको अनुगमनलाई अनाधिकृत भनेको छ । नेपाल शिक्षक महासंघ बांकेले आज एक बिज्ञप्ती प्रकाशित गर्दै परिक्षा कैन्द्रहरुमा अनुगम गरेकोमा आपत्ती जनाएको छ । परिक्षा केन्द्रमा अनुगमन गरि चिटको राश बरामद गर्दा बिद्यार्थीहरुलाई त्रास पैदा भएको महासंघले बताएको छ ।
प्रतिक्रिया दिनुहोस्