काठमाडौँ , ४ वैशाख । काठमाडौँ महानगरपालिकाले विश्व सम्पदा सूचीमा रहेको दुई विश्वसम्पदा क्षेत्र हनुमानढोका दरबार क्षेत्र र स्वयम्भूलाई जोड्न काठमाडौँ महानगरपालिकाले पद यात्राको गुरु योजना तयार गरेको छ । आउँदो विहिबार सार्वजनिक गरिने गुरुयोजनाबाट उक्त क्षेत्रभित्र रहेका स्थानीय सांस्कृतिक सम्पदाको प्रवद्र्धन गर्ने, स्थानीयको आर्थिक विकासमा टेवा पुर्याउने, पर्यटनको विकास गर्ने र सम्पदाको मुल्यमान्यता बारे चेतना अभिवृद्धि गर्ने लक्ष्य राखिएको छ ।
विश्व सम्पदा सूचीमा रहेको दुई विश्वसम्पदा क्षेत्र हनुमानढोका दरबार क्षेत्र र स्वयम्भूलाई जोड्न काठमाडौँ महानगरपालिकाले गुरु योजना तयार गरेको छ । २२ सय मिटरको दुरीमा रहेका यि दुई सम्पदालाई विश्व सम्पदा दिवस –२०१९ को अवसर पारेर आउँदो बिहीबार अर्थात अप्रिल १८ तारिखका दिन हनुमानढोका दरबार क्षेत्रमा उक्त सम्पदा पदयात्राको गुरु योजना सार्वजनिक गरिने भएको हो । सम्पदा पदयात्रामार्फत उक्त दुरीको क्षेत्रभित्र रहेका स्थानीय सांस्कृतिक सम्पदाहरुको प्रवद्र्धन गर्ने, स्थानीय जनताको आर्थिक विकासमा टेवा पुर्याउने, आन्तरिक एवम् बाह्य पर्यटनको विकास गर्ने र सम्पदाको मुल्यमान्यता बारे जनमानसमा चेतना अभिवृद्धि गर्ने लक्ष्य राखिएको छ । काठमाडौँ महानगरका मूर्त एवं अमुर्त सम्पदाको पहिचान, पुस्तान्तरण तथा सम्बद्र्धनको कार्यमा पनि यो पदयात्रा सहायकसिद्ध हुने महानगरपालिकाले विश्वास लिएको छ ।
काठमाडौँको हनुमानढोका दरबार क्षेत्रबाट विश्वसम्पदा सूचीमा सूचीकृत स्वयम्भूसम्म पुग्दा इतिहासका विभिन्न कालखण्डमा निर्माण भएका मन्दिर, बहाःबही, ढुंगेधारा, पाटी, सत्तल आदि जस्ता सम्पदाहरु अवलोकन गर्न सकिनेछ । महानगरपालिकाले सम्पदाहरु पहिचान गर्न विभिन्न संकेत चिन्हहरु राख्ने, स्थानीय घरहरुलाई परम्परागत स्वरुपमा ल्याउने, ठाउँठाउँमा स्थानीयता झल्किने चित्रकला, भित्तेचित्रको प्रदर्शन गर्ने, मार्गमा भएका पाटी, पौवा तथा सत्तलको मर्मत, सम्भार तथा संरक्षण गर्ने बताएको छ । यी दुई सम्पदालाई जोड्ने पदमार्गमा अवस्थित मूर्त एवं अमुर्त सम्पदा तथा सांस्कृतिक परम्पराहरुको अभिलेखीकरण, प्रवद्र्धन र संग्रह गरिनेछ । यसका लागि आर्ट ग्यालरी, पुस्तकालय र पर्यटन सूचना केन्द्र स्थापना गरिनेछ ।
यस दुरीभित्र मौलिक परम्पराअन्र्तगत रहेर बाटो, म्युजियम निर्माण गरिने समेत योजना छ । तत्काल पूर्वाधार निर्माणका लागि १० करोड लगानी गर्ने र आगामी आर्थिक वर्षबाट निरन्तर बजेट विनियोजन गरेर काम सम्पन्न गर्ने काठमाडौं महानगरपालिका वडा नं.१८ का अध्यक्ष तथा सम्पदा तथा पर्यटन समितिका संयोजक न्हुच्छेकाजी महर्जनले बताए । पर्यटनको लागि सुचना केन्द्र राखिने र सम्पदाको महत्वका बारेमा विश्वस्तरमा प्रकाश पारिने पनि संयोजक महर्जनको भनाइ छ ।
दुइ विश्वसम्पदालाई पदयात्राबाट जोड्ने महत्वपूर्ण गुरु योजना तयार भएपनि यसलाई व्यवस्थित र सुन्दर बनाउन चुनौति देखिन्छ । हनुमानढोका क्षेत्र परिसरमा रहेका भवनहरु भुकम्पले क्षतिग्रस्त बनाएका छन् । बाटो साँघुरा र फोहोर छन् । यसले सकारात्मक भन्दा नकारात्मक प्रचार बढी हुने खतरा देखिन्छ । तत्काल बाटो फराकिलो पार्ने, भत्केका घरलाई पुनः निर्माण गर्ने अवस्था नरहेको भएपनि सधैं त्यस्तै अवस्थामा नराखिने काठमाडौं महानगरपालिका वडा नं. २७ का वडा अध्यक्ष चिनिया मान बज्राचार्यले बताए ।
दुइ सम्पदालाई पदयात्रा बाट जोडेर सम्पदाको प्रचारप्रसार र सुदृढिकरणमा लाग्न खोज्नु महानगरपालिकोको सकारात्मक कदम हो । काम के कति हुनेछ र कसरी गरिनेछ भन्ने चाहिँ आगामी दिनमा देखिनेनै छ ।
प्रतिक्रिया दिनुहोस्