बुटवल, २८ फागुन ।
राप्रपा अध्यक्ष कमल थापाले सरकारले सिके राउतसंग गरेको सहमतीपत्रमा राउत समुहले राष्ट्र बिखण्डनको एजेण्डा त्यागेको भन्ने कुरा नआएको बताउनुभएको छ । राप्रपाले १४ दिन अघि थालेको राष्ट्रिय स्वाभिमान यात्राका क्रममा बुटवल पुग्नुभएका अध्यक्ष थापाले आज पत्रकारहरुसंग कुरा गर्दै राउतसंगको सहमती रहस्यमय रहेको टिप्पणी गर्नुभयो ।
उहांले दिल्लीमा नेपालका राजनितीकदल र तत्कालिन माओबादी बिच १२ बुंदे सहमती भएदेखि नै नेपालमा बैदेशीक चलखेल बढेको आरोप लगाउंदै त्यसैबेला देखि नेपाल अन्तरराष्ट्रिय रणभुमी भएको बताउनुभयो ।
राप्रपा पुरानो परम्परागत ब्यवस्थाको पक्षमा नरहेको स्पष्ट पार्दै अध्यक्ष थापाले परिवर्तनकारी शक्ति र परम्पराबादी शक्तिको बिचबाट मध्यमार्गी राजनितीक प्रणाली राप्रपाको निती भएको बताउनुभयो । राप्रपा पश्चगामी र प्रतिगामी दुबै बिचारको पार्टी नभएको उहांको भनाई छ ।
उहांले गणतन्त्र स्थापना पछि धर्मसंस्कृति प्रतिको आक्रमण बढेको, भ्रष्टाचार बढेको, बिखण्डनकारीको उदय भएको र लोकतन्त्रको आवरणमा लुट तन्त्र मौलाएको बताउनु भयो ।
राप्रपाले रथ सहित सुरु गरेको मेचिमहाकाली यात्रा आज बुटवलबाट पोखरा तर्फ प्रस्थान गरेको छ ।