बुटवल, २२ फागुन ।
पाँच नम्बर प्रदेश सरकारले २०७६ लाई लुम्बिनी भ्रमण वर्षका रुपमा मनाउने भएको छ । लुम्बिनीमा आन्तरिक पर्यटकको आवागमनमा बृद्धि गर्ने योजना सहित भ्रमण वर्ष घोषणाको तयारी गरिएको छ ।
भ्रमण वर्ष घोेषणाका लागि बुधबारको मन्त्रीपरिषद बैठकले बजेट बिनियोजन समेत गरेको छ । सवा ४ करोड बजेट सहित भ्रमण वर्षको कार्यक्रम स्विकृत गरेको सरकारका प्रवक्ता बैजनाथ चौधरीले जानकारी दिनुभयो । आन्तरिक पर्यटन प्रवद्र्धनका लागि भ्रमण वर्षमा कार्यक्रमहरु हुनेछन ।
बुधबारको मन्त्रीपरिषद् बैठकले प्रदेश भूमिहीन करार खेती अनुदान कार्यबिधि समेत पारित गरेको छ । यो प्रदेश सरकारको महत्वाकांक्षी कार्यक्रम हो । जमिन नहुने व्यक्तिले भाडामा खेती गरे तीन लाखसम्म वार्षिक अनुदान पाउनेछन । त्यसका लागि तराईमा ५ बिगाहा र पहाडमा ५० रोपनीमा खेती गर्नुपर्नेछ । बैठकले मुख्यमन्त्री ग्रामिण विकास कार्यक्रममा कपिलवस्तुको मायादेवी गाउपालिकालाई पनि समावेश गर्ने निर्णय गरेको छ । त्यस्तै प्रदेश सेवाका कर्मचारी व्यवस्थापन कार्यबिधि समेत पारित भएको छ । यो कार्यबिधिले कर्मचारी सरुवामा दुई वर्षे बन्देज लगाउने प्रवक्ता चौधरीले बताउनुभयो ।