बुटवल, २२ फागुन ।
प्रदेश नम्बर पाँचको स्थायी राजधानी र नामाकरण टुङ्गो लगाउने विषय लम्बिने भएको छ । प्रदेशको स्थानीय राजधानी र नामाकरण सम्बन्धी विशेष समितिको म्याद पुनः तीन महिना थप गरिएको छ । यस विषयमा समितिको म्याद थपिएको यो दोस्रो पटक हो । प्रदेशसभाको बुधवारको बैठकमा समितिको म्याद तीन महिना थप गरिएको सदनसमक्ष सभामुख पूर्णबहादुर घर्तीले जानकारी गराउनुभएको थियो । राजधानीका लागि जिल्लाहरूबाट आएका सुझावहरूको अध्ययन गरी विज्ञहरूसँग छलफल गर्न गरी प्रतिवेदन तयार पार्न समय लाग्ने भएकोले समितिको म्याद पुनः थप गरिएको हो । समितिले पहिलो तीन महिना काम नै नगरी बिताएको थियो ।
समितिको म्याद जेठ २६ गतेसम्मका लागि रहने छ । समितिको म्याद यही फागुन २६ गतेसम्मका लागि मात्र थियो । यही फागुन ९ गतेदेखि समितिले प्रदेशका १२ वटै जिल्लामा पुगेर जनता, राजनीतिक दल, पत्रकार, संघरसंस्थाका प्रतिनिधिहरूसँग सुझाव लिएर प्रदेशको अस्थायी राजधानी बुटवल आइपुगेका छन् । समिति गएको साउनमा गठन भएको थियो । सहमति नभए दुई तिहाई बहुमतबाट प्रदेशको स्थायी राजधानी टुङगाउनुपर्ने संवैधानिक व्यवस्था छ । प्रदेश पाँचको स्थायी राजधानी र नामाकरणको विषय टुङगो लाग्ने विषय अब झनै लम्बिने देखिन्छ । बिहीवारदेखि जिल्लाहरूबाट आएका सुझावहरूलाई केलाउने समितिले बताएको छ ।
प्रतिक्रिया दिनुहोस्