काठमाडौं, १६ फागुन । ताप्लेजुङमा हेलिकप्टर दुर्घटनामा निधन भएका संस्कृति, पर्यटन तथा नागरिक उड्डयनमन्त्री रवीन्द्रप्रसाद अधिकारीसहित सातै जनाको शव श्रद्धाञ्जलीको लागि काठमाडौंको टुंडिखेलमा राखिएको छ ।

राष्ट्रपति विद्यादेवी भण्डारी, उपराष्ट्रपति नन्दबहादुर पुनले मन्त्री अधिकारीप्रति श्रद्धाञ्जलि व्यक्त गर्नुभएको छ ।

त्यस्तै, प्रधानमन्त्री केपी शर्मा ओलीले राष्ट्रिय झण्डा ओढाएर श्रद्धाञ्जलि अपर्ण गर्नुभएको छ । त्यसैगरी टुंडिखेलमा पुगेर नेकपा अध्यक्ष पुष्पकमल दाहाल प्रचण्ड, पूर्वप्रधानमन्त्री तथा नेकपा नेता माधवकुमार नेपाल, प्रतिनिधिसभा सभामुख कृष्णबहादुर महरा, गृहमन्त्री रामबहादुर थापा, रक्षामन्त्री इश्वर पोखरेल, अर्थमन्त्री युवराज खतिवडा, श्रममन्त्री गोकर्ण विष्ट, राष्ट्रियसभा अध्यक्ष गणेशप्रसाद तिमल्सिना, पूर्व सभामुख सुभाषचन्द्र नेम्वाङ, नेकपा नेता विष्णु पौडेल लगायत नेकपा नेता तथा कार्यकर्ताले श्रद्धाञ्जलि व्यक्त गर्नुभएको छ ।
सर्वसाधारणहरुबाट पनि श्रद्धाञ्जली दिने कार्यक्रम जारी छ । श्रद्धाञ्जली ब्यक्त गर्न प्रतिपक्षदलका नेता तथा कार्यकर्ताहरुको समेत उपस्थिति रहेको छ ।

राति अबेरमात्र पोष्टमार्टमको काम सकिएकाले अहिले ८ बजेदेखि बिहान ११ बजेसम्म मन्त्री अधिकारी, यति एयरलाइन्सका प्रबन्ध निर्देशक आङछिरिङ शेर्पा, नेपाल नागरिक उड्डयन प्राधिकरणका उपमहानिर्देशक वीरेन्द्रप्रसाद श्रेष्ठ र निर्देशक धु्रव भोछिभोया, प्रधानमन्त्री तथा मन्त्रिपरिषद् कार्यालयका उपसचिव युवराज दाहाल, हेलिकप्टरका क्याप्टेन प्रभाकर केसी र मन्त्री अधिकारीका सुरक्षाकर्मी अर्जुनकुमार घिमिरेको शव श्रद्धाञ्जलीको लागि टुंडिखेलमा राखिएको हो ।
काठमाडौंमा श्रद्धाञ्जली दिइसकेपछि आजै मन्त्री अधिधकारीको पार्थिव शरीर पोखरा लगिने छ । पोखराको प्रदर्शनी केन्द्रमा श्रद्धाञ्जलिका लागि राख्ने तयारी गरिएको छ । त्यसपछि पोखराको नया“ बजार, महेन्द्रपुल, रानीपौवा, हस्पिटल चोक लगायत हु“दै सेती नदीको रामघाटमा अन्त्येष्टी गरिने जनाइएको छ । अरुको पनि शव परिवारलाई बुझाएपछि आफ्नै परम्परा अनुसार अन्तिम संस्कार हुने गृह मन्त्रालयले जनाएको छ ।

काठमाण्डौबाट तेह्रथुमको चुहानडा“डामा विमानस्थलको सम्भाव्यता अध्ययनका लागि मन्त्री अधिकारीसहितको टोली कार्यक्रम सकेर ताप्लेजुङको पाथीभरा हु“दै काठमाण्डौ फर्किने क्रममा हेलिकप्टर दुर्घटनामा मन्त्री अधिकारीसहित ७ जनाकै निधन भएको हो ।