काठमाडौँ, १३ फागुन । गत शुक्रबार राति साढे ८ बजेतिर ललितपुरको नख्खुस्थित एनसेलको मुख्य कार्यालयअगाडि बम विस्फोटमा संलग्न आरोपमा पक्राउ परेका ६ जनामध्ये तीन जनाविरुद्ध प्रहरीले म्याद थप गराएको छ। उनीहरू मध्ये एकजना नेत्रविक्रम चन्द विप्लव नेतृत्वको नेकपाका कार्यकर्ता भएको प्रहरीले जनाएको छ।
प्रहरीका अनुसार कालिकोटको रासकोट नगरपालिका–१ घर भई हाल ललितपुर महानगरपालिका–२३, धापाखेलमा बस्ने २० वर्षीय मानबहादुर तिरुवासहित ललितपुरका दुइ स्थानीय युवा रहेका छन्। उनीहरू बिरूद् ललितपुर जिल्ला अदालतबाट तीन दिन म्याद थप गराएर अनुसन्धान अघि बढाइएको हो।
उक्त तीन जना विप्लव नेतृत्वको नेपाल कम्युनिस्ट पार्टीका कार्यकर्ता भएको प्रहरीको दाबी छ।
यस्तै उक्त बम काण्डमा संलग्न आशंकामा पक्राउ परेका एनसेल कार्यालयकै दुई सुरक्षा गार्डलाई भने हाजिरी जमानीमा राखेर बयान लिने र अन्य अनुसन्धान जारी रहेको प्रहरीले जानकारी दिएको छ। अर्का एक जनालाई भने तारिखमा छाडिएको महानगरीय प्रहरी परिसर ललितपुरले जनाएको छ।
अभियुक्तहरूको बयान, कल डिटेल र अन्य विवरण संकलन जारी राखेर घटनाको गम्भीर ढंगले अनुसन्धान भइरहेको प्रहरीले जनाएको छ।
प्रतिक्रिया दिनुहोस्