बुटवल, १ फागुन ।
प्रदेश नम्बर ५ स्थापना दिवसलाई प्रदेश नम्बर ५ सरकारले ३ दिन सम्म मनाउने भएको छ । प्रदेश स्थापनालाई विभिन्न रचनात्मक कार्यक्रम गरी मनाईने प्रदेश सरकारका आन्तरिक मामीला मन्त्रालयले जानकारी दिएको छ । आन्तरिक मामीला मन्त्रालयका अनुसार प्रदेश सरकारले फागुन २ गते देखि ४ गते सम्म विभिन्न कार्यक्रम गरी स्थापना दिवस मनाउने निर्णय गरेको छ ।
फागुन २ गते प्रदेश ५ का ६ वटा मुख्य मुख्य स्थानको राजमार्गमा प्रदेश सरकारका मन्त्रीहरुको उपस्थितीमा सरसफाई कार्यक्रम गरिने आन्तरिक मामिला तथा कानून मन्त्री कुल बहादुर केसीले जानकारी दिनुभयो । प्रदेश सरकारले स्थापना भएको मुख्य दिन फागुन ३ गते सार्वजनिक विदा दिने समेत घोषणा निर्णय छ ।
फागुन २ गते हुने राजमार्ग सरसफाई कार्यक्रममा मुख्यमन्त्री शंकर पोखरेलले बुटवलको जितगढीबाट , आन्तरिक मामिला तथा कानुन मन्त्री कुल प्रसाद के सी बांकेको कोहलपुर चोकबाट, भौतिक विकास मन्त्री बैजनाथ चौधरी कपिलवस्तुको चन्द्रौटा चोकबाट, उद्योग, पर्यटन, वन तथा वातावरण मन्त्री लिला गिरी बर्दियाको भुरिगाउँबाट, सामाजिक विकास मन्त्री सुदर्शन बराल दाङको लमही चोकबाट र भूमि व्यवस्था, कृषि तथा सहकारी मन्त्री आरती पौडेल नवलपरासीको बर्दघाट चौकबाट सरसफाई अभियानमा सहभागी हुने छन् ।
सरसफाई कार्यक्रममा राजनीतिकर्मी, कर्मचारी, सुरक्षा निकाय शिक्षण संस्थाहरुलाई समेत आग्रह गरिएको मन्त्री केसीले बताउनुभयो ।
मन्त्री केसीका अनुसार राजमार्गलाई खुला दिशामुक्र क्षेत्र बनाउनका लागि विशेषतः वन जंगल क्षेत्रमा आवश्यक पर्ने स्थानमा पुरुष र महिलाका लागि अलग अलग शौचालय निमार्ण को शिलान्यास गराउने समेत निर्णय गरिरएको छ । सोही दिन नै प्रदेश राजधानी र जिल्ला सदरमुकाममा रक्तदानको कार्यक्रम संचालन गर्ने र सोको व्यवस्था सामाजिक विकास मन्त्रालयले मिलाउने भएको छ ।
फागुन ३ गते बुटवल मण्डपमा आयोजना हुने मुल समारोहमा प्रदेश सरकारले प्रदेश प्रमुख उमाकान्त झाको उपस्थितीमा प्रदेश सरकारको प्रगति प्रतिवेदन सहितको स्मारिका विमोचन गर्ने समेत कार्यक्रम रहेको छ ।
फागुन ४ गते प्रदेश भित्रका मेडिकल कलेज र सामुदायिक तथा नीजि अस्पतालहरु लगायत सबै स्वास्थ्य संस्थालाई बीचमा उपयुक्त दिन र समयमा सकभर दुर्गम र विकट स्थानमा रहेका जनतालाई लक्षित गरी स्वास्थ्य शिविर संचालन गर्नको लागि सामाजिक विकास मन्त्रालय मार्फत ब्यवस्था गरिएको छ ।