काठमाडौं/पोखरा — नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले यसपटक कांग्रेस वा एमालेसँग चुनावी समीकरण नगर्ने स्पष्ट घोषणा गरेका छन्। देउवा वा ओलीसँग भेटघाट हुँदैमा अनावश्यक अड्कलबाजी नगर्न आग्रह गर्दै उनले पार्टी एक्लै चुनाव लड्ने निर्णयमा दृढ रहेको बताएका छन्।

म्याग्दी र कास्कीमा आयोजित चुनावी सभाहरूलाई सम्बोधन गर्दै प्रचण्डले सामाजिक सञ्जालमा फैलाइने ‘फेरि मिल्न लाग्यो’ भन्ने हल्लाबाट कार्यकर्तालाई विचलित नहुन आग्रह गरे। “कहिलेकाहीँ मैले शेरबहादुर देउवा वा केपी ओलीलाई भेटें भन्दैमा तरंगित नहुनुहोस्,” उनले भने, “यो पटक कसैसँग पनि समीकरण गर्नेवाला छैनौँ, गर्दैनौँ। आफ्नै खुट्टामा उभिएर चुनाव लड्ने नीति लिएका छौँ।”

‘समीकरण नगर्दा पार्टीपंक्ति उत्साहित’

प्रचण्डका अनुसार कांग्रेस–एमालेसँग सहकार्य नगर्ने निर्णयले ७७ वटै जिल्लामा पार्टीपंक्ति उत्साहित बनेको छ। “पार्टीले यसपटक कांग्रेस र एमालेसँग समीकरण गरेन भन्नेमा कार्यकर्तामा उत्साह देखिएको छ,” उनले भने, “नेतृत्व फेरि खुट्टा छोड्छ कि भन्ने शंका नराख्नुहोस्, हामी दृढ छौँ।”

उनले निर्वाचनसम्म तीन हप्ता पूर्ण रूपमा पार्टीलाई दिन आग्रह गर्दै देशभरका नेता–कार्यकर्तालाई घरदैलो र प्रचारप्रसारमा सक्रिय हुन निर्देशन दिए। “फागुन २१ को निर्वाचन सुनिश्चित छ। अब द्विविधा होइन, अभियानमा जुट्ने समय हो,” उनले भने।

‘महाधिवेशनको असर तल्लो तहसम्म’

कांग्रेसको विशेष महाधिवेशन र एमालेको महाधिवेशनपछि ती दलभित्रको शक्ति–सन्तुलन र गुटगत असर जिल्ला तहसम्म पुगेको प्रचण्डको विश्लेषण छ। “कांग्रेसभित्र के भइरहेको छ, एमालेभित्र के भइरहेको छ, सबैले देखिरहनुभएको छ,” उनले भने, “त्यसको असर तलसम्म परेको छ। यो परिस्थितिले नेकपालाई पहिलो पार्टी बन्ने अवसर दिएको छ।”

उनका अनुसार विपक्षी दलहरू पनि नेकपालाई मुख्य प्रतिस्पर्धीका रूपमा स्वीकार गर्न बाध्य भएका छन्। “निर्वाचनको माहोल हाम्रो पक्षमा बढ्दै गएको छ,” उनले दाबी गरे।

संवाद जारी, तर तालमेल होइन

प्रचण्डले सबै दलसँग संवाद कायम राख्ने नीति जारी रहने स्पष्ट पारे। तर संवाद र चुनावी तालमेल फरक विषय भएको उनले जोड दिए। “राष्ट्र र जनताको पक्षमा उभिन सक्ने जो–कोहीसँग सहकार्य गर्न सकिन्छ,” उनले भने, “तर अहिलेको चुनावी लडाइँमा कुनै तालमेल हुँदैन। यो चुनाव एक्लै लड्ने निर्णय हो।”

उनले कसैसँग स्थायी दुश्मनी वा अन्धा मित्रताको राजनीति नगर्ने बताए। “हामी राष्ट्रलाई अर्को दुर्घटनामा पर्नबाट जोगाउने जिम्मेवारी बोकेका छौँ,” उनले भने।

‘पहिलो पार्टी बनेर निकास दिने’

प्रचण्डले निर्वाचनपछि नेकपा पहिलो पार्टी बन्ने दाबी दोहोर्‍याए। “सबैले मेहनत गर्‍यौँ भने हामी पहिलो पार्टी बन्छौँ,” उनले भने, “हिजोका कमी कमजोरी सच्याउँदै फेरि देशलाई निकास दिने काम नेकपाले गर्छ।”

चुनावी मैदान तात्दै जाँदा प्रचण्डको सन्देश स्पष्ट छ—यसपटक पुराना समीकरण होइन, ‘स्वतन्त्र प्रतिस्पर्धा’। देउवा र ओलीसँगको भेटलाई राजनीतिक शिष्टाचारको दायरामा सीमित ठान्न उनले आग्रह गरेका छन्। अबको तीन हप्ता निर्णायक हुने भन्दै उनले पार्टीपंक्तिलाई एकजुट र आक्रामक रूपमा मैदानमा उत्रन निर्देशन दिएका छन्।

पार्टीले तल्ला तहका कमिटीलाई बुथमा खटिने स्वयंसेवकहरुलाई प्रशिक्षण दिन समेत भनेको छ । मतगणनाको क्रममा घुसपैठ हुनसक्ने भन्दै पार्टीले त्यसतर्फ सतर्क हुन निर्देशन दिएको छ । ‘बुथमा खटिने स्वयंसेवकहरूलाई आवश्यक प्रशिक्षण र अभिमुखीकरण गर्ने, मतदान गर्नु अघि, मतदान भइरहेको अवधिमा र मतगणना हुँदा सचेत रहने’, पत्रमा भनिएको छ, ‘प्रत्यक्ष र समानुपातिक मतगणनाको कार्य समाप्त नभएसम्म गणनामा संलग्न स्वयंसेवकहरू यथावत् रूपमा कार्यरत रहने ।’

उता, पार्टी संयोजक पुष्पकमल दाहाल प्रचण्डले अबको १५ दिनपछि मुलुकभर नेकपाले सबै दललाई टप्ने बताउनुभएको छ । आज पोखरा पुग्नुभएका उहाँले सञ्चारकर्मीसँग कुराकानी गर्दै विगतमा सभा सम्मेलनको लागि खर्च हुने पैसा अहिले डिजिटल प्रचारमा खर्चिएको भन्दै अबको दुई हप्तापछि पार्टीको माहोल छुट्टै हुने बताउनुभएको हो । ‘ठूला ठूला सम्मेलन र सभा गरेर, लाखौँ खर्च गरेर भोट माग्ने जमान गइसकेको छ, टोल–टोल र घरघरमा गएर आफ्नो कुरा बताउनुपर्नेछ’, उहाँले भन्नुभयो, ‘प्रविधिमा हामी साम्राज्यवादीसँग प्रतिस्पर्धा त गर्न सक्दैनौँ, तर गलत सूचनालाई काउन्टर दिन सकिन्छ, हाम्रो साथीहरु लागिराख्नुभएको छ, १५ दिनपछि सबैलाई टप्यो भन्ने दिन आउँदैछ ।’

प्रचण्डले आजैमात्र गण्डकी प्रदेशका पोखरा, पर्वत, बागलुंग १ र बागलुंग २का फरक फरक कार्यक्रममा पार्टी पंक्तिलाई प्रशिक्षण दिएका छन् ।