काठमाडौं, ३० वैशाख । प्रतिनिधि सभाका सांसदहरुले ठप्प रहेको चिया निर्यातका लागि तत्काल भारत सरकारसँग कूटनीतिक पहल गर्न सरकारसँग माग गरेका छन् । 

बुधवार बसेको प्रतिनिधि सभा बैठकको शुन्य समयमा बोल्दै सांसदहरुले किसानलाई मलको अभाव हुन नदिने गरी तत्काल आवश्यक व्यवस्था मिलाउन पनि सरकारलाई सचेत गराएका छन् । सांसद सुहाङ नेपालले ठप्प रहेको चियाको निर्यातका लागि तत्काल भारत सरकारसँग कुटनीतिक पहल गर्न सरकारको ध्यानाकर्षण गराउनु भयो । उहाँले चिया किसान र उद्योगीहरुको संरक्षणका लागि ठोस नीति बनाउन पनि सरकारलाई सचेत गराउनु भयो । 

सांसद नेम्वाङले भन्नुभयो, ’टि बोर्ड अफ इन्डियाको पछिल्लो नीतिले चिया निर्यात ठप्प हुन पुगेको छ । यसले किसान, श्रमिक, उद्योगी, निर्यातकर्ता र देशको अर्थतन्त्रलाई प्रत्यक्ष असर पारिरहेको छ । त्यसैले म सरकारसँग आग्रह गर्न चाहन्छु–भारत सरकारसँग तत्काल कूटनीतिक पहल गरियोस, चिया निर्यातको अवरोध समाधान गरियोस् । र चिया उद्योगी र किसानहरुको संरक्षणको लागि ठोस नीति बनाइयोस् ।’

सरकारले किसानलाई मलको अभाव हुन दिन नहुने पनि सांसदहरुले बताएका छन् । सांसद सुनिल केसीले किसानले आवश्यक मल पाउने गरी व्यवस्था गर्न सरकारलाई दबाब दिनुभएको हो । उहाँले मेलम्चीको पानी काठमाडौंका जनताले कहिलेसम्म कुर्नुपर्ने हो ? त्यसको जवाफ दिन पनि सरकारसँग माग गर्नुभयो । 

उहाँले भन्नुभयो, ‘सरकारलाई आवश्यक मात्रामा मल पाउने व्यवस्था मिलाइयोस् । काठमाडौं क्षेत्र नम्बर २ का जनताले मेलम्चीको खानेपानी खान अझै कहिलेसम्म कुर्नुपर्ने हो ? तीनकुनको सार्वजनिक जग्गा कुन उद्देश्यका लागि कब्जा गरियो ? यस सम्बन्धमा तत्कालीन सरकारका प्रधानमन्त्री र सम्बन्धित मन्त्रीसँग जवाफ मागियोस । यसरी राज्यले जनताको सम्पती कहिलेसम्म कब्जा गरेर राख्ने हो ?’

सांसद सुरेशकुमार चौधरीले भारतीय सीमा क्षेत्रको पूर्वाधार विकासमा जोड दिन सरकारलाई सुझाव दिनुभयो । 
उहाँले भन्नुभयो,‘सीमा क्षेत्रको गाउँमा विकासको कुनै पूर्वाधार पुगेको छैन । बाटो, विद्युत, स्वास्थ्य, शिक्षा, सञ्चार समेतको समस्या छ । यस्ता बस्तीहरुमा विकासको पूर्वाधार निर्माणमा ढिलाई नगर्न म सरकारको ध्यानाकर्षण गराउन चाहन्छु । बाँकेका धेरै गाउँहरु हराएको जस्तो देखिएको छ । त्यहाँ विकासमार्फत ती गाउँहरुलाई अघि बढाउन आवश्यक छ । यसमा सरकारको ध्यान जाओस् ।’

बर्दियालगायतका सीमा क्षेत्रका जनताले विभिन्न खालको समस्या झेल्नुपरेको उल्लेख गर्दै त्यहाँका जनताको समस्या समाधानमा सरकार गम्भिर भएर लाग्नुपर्ने पनि सांसद चौधरीले बताउनु भयो ।