बिरगंज, १२ माघ । बारामा एक स्कार्पियो जीप दुर्घटना हुँदा सशस्त्र प्रहरीका प्रहरी उपरिक्षकको घटनास्थलमै मृत्यु भएको छ । दुर्घटनामा परि सशस्त्र प्रहरी बलको १२ नम्बर गण बारामा कार्यरत शसस्त्र प्रहरी उपरीक्षक बलराम पोखरेलको मृत्यु भएको हाम्रा समाचारदाता शेखर छतकुलीले जानकारी दिएकाछन् ।
दुर्घटनामा बाराका प्रमुख जिल्ला अधिकारी गणेश भट्टराईसहित अन्य ३ जना गम्भीर घाइते भएका छन् । घाइते हुनेहरुमा सशस्त्र प्रहरीका हवल्दार सञ्जयकुमार यादव, प्रहरी जवान शम्भु गुरुङ र चालक जगत पटेल छन् । घाइते मध्ये बाराका प्रमुख जिल्ला अधिकारीको अवस्था गम्भिर रहेको प्रहरीले जनाएको छ । भट्टराईको बिरगंज स्थित बिरगंज हेल्थ केयर सेण्टरमा उपचार भै रहेको छ । प्रहरीका अनुसार प्रजिअ भट्टराईलाई भने उपचारका लागि हेलिकोप्टरमार्फत काठमाडौं पठाउने तयारी भईरहेको छ ।
कर्मचारी मिलन केन्द्र बाराले आयोजना गरेको पिकनिक कार्यक्रमबाट कलैया तर्फ फर्किने क्रममा जिप पथलैया–निजगढ सडकखण्डको पसाहा पुल नजिक दुर्घटना भएको थियो ।
जिल्ला प्रशासन कार्यालय बाराको ना १ झ १६३३ नम्बरको स्कार्पियो जीप सडकमा रोकी राखेको ट्याक्टरको टेलरसँग ठोक्किएको सशस्त्र प्रहरी बल बाराले जनाएको छ ।
प्रतिक्रिया दिनुहोस्